Үнэндээ би ч өөрөө хамгийн “муу хувцаслагч” байсан. Хаашаа явах гэж буй, хэнтэй уулзах гэж байгаа нь миний өмсөх хувцсанд ямар хамаатай юм бэ? Би өөрийнхөөрөө, дуртайгаа өмсөнө. Учир нь миний юу өмссөн байх нь хүнд чухал бус, харин миний ямар чадвартай, мэдлэгтэй, хариуцлагатай нэгэн байх нь л чухал хэмээдэг байлаа. Гэхдээ энэ бодол жил гаруйн өмнөөс орвонгоороо эргэсэн юм.
Нэг удаа найзынхаа шинэ байранд зочлохоор болсон юм. Ижил нэртэй олон хотхон, ижил загварын олон байшингууд дунд төөрөхдөө зөрж өнгөрсөн нэгэн залуугаас тусламж хүсэж, хаягийг нь хэлж асуухад “Хоёр гудамжны дараа” гэж хэллээ. Би ч заасан газар тийш дөхөж явахдаа “Юмыг яаж мэдэх вэ?” гэдэг шиг дахин зөрж өнгөрсөн өөр нэг хүнээс очих хаягаа дахин лавлатал “Яг энэ гудамжны цаад өнцөгт бий” гэж зөвлөлөө. Би аль зөвлөгөөг нь дагасан бол?
Үнэндээ сүүлийн залуугийн хэлсэн нь үнэн байлаа. “Яагаад хоёр дахь залуугийн хэлсэн зөвлөгөөг би дагасан бэ?” гэж өөрөөсөө асууж явахдаа тэр залуу илүү “итгэж болохоор” харагдаж байсныг санасан юм. Тодруулбал, эхний залуу энгийн л нэг жинсэн өмд болон подволк, саравчтай малгай өмссөн, хаашаа явж байгаа нь тодорхойгүй мэт. Харин хоёр дахь залуугийн тухайд хослол, цагаан цамц өмсөж, зангиа зүүсэн, цэвэрхэн өнгөлсөн гутал өмсөж, гартаа ажил хэрэгч цүнх барьсан нь надад “Энэ хүн хаа хүрэхээ мэдэж байгаа” гэсэн сэтгэгдлийг төрүүлж, улмаар түүний үгэнд итгэснээ ойлгосон юм.
RELATED STORIES
Энэ жижигхэн явдлаас би “Өөрийн тань хэлж байгаа үг үнэн, эсэх нь таны харагдаж байгаатай яг таарч байгаа, эсэхийг шалгаж байх хэрэгтэй. Хэлсэн үг, байгаа байдал хоёр зөрөх шиг муухай зүйл үгүй” гэж нэгэн хүн хэлснийг санаж, “Хэрэв хүнд итгэл үнэмшил төрүүлэхийг хүсвэл яг тэгж л харагдах хэрэгтэй юм байна” гэдгийг ойлгож билээ.
Ихэнхдээ бид гэрээсээ гарахдаа, эсвэл дэлгүүрээс шинэ хувцас худалдаж авахдаа зөвхөн өөрт таалагддаг өнгө загвар, бусад хувцастайгаа зохицох эсэх, эсвэл саяхан харсан сэтгүүлийн нүүрэн дээрх зураг, фэйсбүүкээр харсан шиг яг одоо тренд болж байгаа зүйлсээс сонголтоо хийдэг. Харин бид “Энэ хувцас миний тухай юуг өгүүлэх вэ? Үүнийг өмссөнөөрөө би бусдад яаж харагдах бол?” хэмээн өөрөөсөө асуудаг уу?
Ажилдаа явахын өмнө өөрийгөө даргынхаа нүдээр хар. Та ажилдаа дуртай, хариуцлагатай, өнөөдөр ямар ч сорилтод бэлэн нэгэн шиг харагдаж байна уу? Хамтран ажиллагсдынхаа нүдээр та тэднийг манлайлж, үлгэр жишээ байж чадахаар нэгэн шиг харагдаж байна уу?
Пиджактайгаа та сагс тоглоход итгэлтэй байж чадахгүй шиг ажил хэрэгч хувцаслаагүй үедээ таны өөрийн тань “ажил хэрэгч” түвшин тодорхой хэмжээгээр буурч байдаг.
Хэн нэгэнд итгэл төрүүлэхийн өмнө та өөрөө өөртөө итгэлтэй байх хэрэгтэй учир орчин, нөхцөлдөө тохируулан хувцаслаж байхыг хамгийн эхэнд танд зөвлөж байна. Харин бусдад итгэл төрүүлэхүйц харагдах талаас хөх өнгийн хослолыг онцгойлон санал болгомоор байна. Учир нь хөх өнгөний сэтгэлзүйд нөлөөлөх чадамж нь уужуу тайван, итгэл найдварын бэлгэдэл байдаг билээ.
Дашрамд сонирхуулахад, яг энэ нөхцөлд саарал болон хар хослолоос татгалзах хэрэгтэй бөгөөд саарал өнгө нь бүхэлдээ үл ойлгогдом, нууцлаг байдлыг илтгэдэг ба хүний анхаарал татах шаардлагагүй, энгийн өдрүүдэд ажилдаа өмсөх нь тохиромжтой. Харин хар өнгийн хослолын тухайд агуулгын хувьд гоёлын загварт тооцогддог боловч ажил хэрэгт бол бусдаас илүү хүчирхэг, эрхэмсэг байдлаа харуулахын тулд өмсвөл зохино.
Стилист Оюу
