Барууны хатуу хориг арга хэмжээний үр дүнд хилийн чанадын зээлдүүлэгчдэд төлбөрөө барагдуулах сувгууд нь хаагдаад буй ОХУ 1918 оноос хойш анх удаа гадаад валютын дефолтод орсныг Bloomberg мэдээллээ.
ОХУ-ын Засгийн газрын 100 сая ам.долларын бондын хүүгийн төлбөр барагдуулах хөнгөлөлттэй хүлээлгийн хугацаа ням гарагт дууссан бөгөөд энэ хугацааг өнгөрүүлсэн тохиолдолд тус улсыг төлбөрийн чадваргүй болсонд тооцох байв.
Улсын нэр хүндэд томоохон цохилт болох дефолтоос зайлсхийхийн тулд Кремль олон сарын турш гадаад өр төлбөрөө барагдуулах бусад арга замыг эрэлхийлсээр ирсэн юм. Оросын нийт гадаад өрийн 40 гаруй тэрбум ам.доллар нь доллар эсвэл еврогоор илэрхийлэгдсэн бөгөөд бараг тал хувь нь хилийн чанадад хадгалагдаж байгаа аж.
Гэхдээ Оросын засгийн газар бүх төлбөрөө цаг тухайд нь эргэн төлөх боломжтой хэвээр байгаа тул үүнийг жинхэнэ дефолт гэж үзэхгүй хэмээн ОХУ-ын Сангийн сайд Антон Силуанов үгүйсгэжээ. “Хэн ч хүссэн бүхнээ зарлаж болно. Гэхдээ юу болж буйг ойлгох нэг нь дефолт болоогүй гэдгийг мэдэж байгаа” хэмээн тэрбээр мэдэгдсэн байна.
Хамгийн сүүлд 1918 онд Большевик хувьсгалын үеэр коммунист удирдагч Владимир Ленин Хаант Орос улсын үеийн гадаад өрийг төлөхөөс татгалзсанаар тус улс дефолтод орж байжээ.
