Хятадын ByteDance компани 2021 оны зургаадугаар сараас 2022 оны зургаадугаар сар хүртэлх хугацаанд гар утасны тоглоом доторх хэрэглэгчдийн худалдан авалтаас 1 тэрбум ам.долларын орлого олж, өмнөх жилийн үзүүлэлтээ 16 хувиар ахиулж чадсан байна.
Богино видео бичлэгийн TikTok платформ болон түүний хятад хувилбар Douyin-ийг эзэмшдэгээрээ танигдсан Bytedance нь сүүлийн жилүүдэд нутаг нэгт Tencent, NetEase компаниудын ноёлдог гар утасны тоглоомын салбарт идэвхтэй хөрөнгө оруулж, цар хүрээгээ хурдацтай тэлээд байгаа юм.
Тус компани өнгөрсөн жил Moonton, C4 гэсэн видео тоглоомын хоёр том студийг худалдаж авсан бол энэ жил дотооддоо тоглоомын бизнесийн тусгай нэгж байгуулжээ.
Дээрх орлогыг зөвхөн Google Play, App Store-д бүртгэгдсэн мэдээлэлд үндэслэн тооцсон бөгөөд ихэнх хувийг нь Bytedance-ийн худалдаж авсан тоглоомууд бүрдүүлсэн ажээ. Жишээлбэл Moonton-ий хөгжүүлсэн “Mobile Legends: Bang Bang” тоглоом дангаараа 317.7 сая ам.доллар олсон бол C4-ийн “Girls Chronicle: Idle Heroine” ойролцоо орлоготойгоор удаалжээ.
Харьцуулбал Tencent-ийн тоглоомуудад хэрэглэгчдийн зарцуулсан мөнгө дэлхийн хэмжээнд 7.9 тэрбум ам.доллараар, NetEase-ийн тоглоомууд 3.1 тэрбум ам.доллараар тоологдож байна.
Хятад улс дотоодын видео тоглоомын салбар дахь хараа хяналтаа чангатгасан тул Bytedance-ийн өсөлтийн түлхүүр нь олон улсад цар хүрээгээ тэлэх явдал болж байна. 2021 онд Бээжингээс 18 хүртэлх насны хүүхдүүд цахим тоглоомыг долоо хоногт гурван цагаас илүүгүй хугацаанд тоглох дүрэм гаргасны зэрэгцээ видео тоглоомоос мөнгө олохын тулд заавал зохицуулах байгууллагаас зөвшөөрөл авах ёстой болгосон билээ.
