“Cartier Tank” бол нэртэйгээ адил хүчирхэг брэнд юм. Кино одод төдийгүй (Кларк Гейбл, Фред Астер) тэргүүн хатагтай (Жаклин Кеннеди, Мишель Обама), хааны удмынхны (Диана гүнж) таашаалд нийцдэг, эрэгтэй, эмэгтэй ямар ч хүн зүүж болох хээнцэр чамин уг цаг 2017 онд 100 дахь жилийнхээ ойтой золгосон юм. Нэрт уран бүтээлч Энди Уорхол хүндэтгэлтэй худалдан авсан цагаа зориулалтынх нь дагуу ашигладаггүйгээрээ алдаршсан юм. “Алдрын оргилд 15 хором” үзэл санааг үндэслэсэн тэрбээр “Би бусдад цаг хэлж өгөхийн тулд “Tank”-ийг зүүдэггүй. Үнэнийг хэлэхэд би цагаа түлхдэг ч үгүй. Зүгээр Tank-ийг зүүмээр санагддаг болохоор л зүүдэг юм” гэсэн удаатай.
1917
Компанийн үүсгэн байгуулагчийн ач хүү Луи Картье Дэлхийн I дайны үед “механик баатар”-аар шалгарч байсан “Renault FT-17” байлдааны хөнгөн танкнаас санаа авч “Tank” брэндийг анх зохиосон талаар компанийн түүхэнд тэмдэглэсэн байдаг. Дөрвөлжин хэлбэртэй “Cartier Santos” загварыг илүү хээнцэр болгон шинэчилсэн гэвэл арай дөхөм болов уу. Анхны “Cartier Tank” цагийг 1918 онд АНУ-ын генерал Жон Першингд ялалтын бэлэг болгон гардуулсан нь брэндийг цэргийн хүчинтэй холбосон оновчтой маркетинг болсон юм.
1919
Ром тооноос гадна минутыг төмөр зам мэт зураасаар илэрхийлж, эрчлүүрт нь индранил суурилуулсан дээрх цагийг Парис хотод худалдахаар болов. “Tank Normale” хэмээн нэрлэгдсэн уг загвар 1920 онд зургаан ширхэг зарагдав.
1921
“Cartier” компани “Normale”-ийн анхны шинэчилсэн загвар, бугуйны хэлбэрт тохирсон хагас дугуй, урт нарийхан загвартай “Tank Cintree”-ийг танилцуулсан нь гэнэтийн явдал болжээ. Цөөн тоогоор худалдаанд гарсан шинэ “Cintree” загвар XX зууны хамгийн эрэлттэй цуглуулгын нэгээр тодорч, үнэ нь энгийн үед 25,000-50,000 ам.долларын хооронд хэлбэлзэж байсан бол цагаан алттай тусгай загвар нь 250,000 ам.долларт хүрч байв.
1926
Жүжигчин Рудольф Валентино хамгийн сүүлд тоглосон “The son of the Sheik” кинондоо “Tank”-аа зүүнэ хэмээн шаардсаны дүнд уг цаг анх удаа кино дэлгэцээр гарчээ.
1963
Тэргүүн хатагтай Жаклин Кеннедид түүний хүргэн ах, ханхүү Станислав Радзивилл 1962 оны “Tank Ordinaire” бэлэглэсэн удаатай. Уг цагийг 2017 оны зургаадугаар сард болсон дуудлага худалдаагаар Ким Кардашьян 379,500 ам.доллараар худалдаж авснаар “Cartier Tank” цувралын хамгийн өндөр үнэд хүрсэн цагаар тодорчээ.
1976
Картьегийн гэр бүл бизнесээ худалдсанаас хойш шинэ эзэд нь 10 гаруй жилийн дараа дундаж үнэтэй “Les Must de Cartier” загварыг танилцуулсан. Харин 1976 онд тод гялтганасан нүүртэй, цагийн тоогүй “Cartier Must de Tank” загвар худалдаанд гарсан юм. Тус бүр нь 150 ам.долларын үнэтэй, алтаар бүрсэн кварц цаг брэндийн нэр сүрийг унагасан гэх боловч борлуулалт нь гайхмаар сайн байсан төдийгүй цуглуулагчдын сонирхлыг татсан хэвээр үлдэж өдгөө 1,000 ам.доллараас доошгүй үнээр зарагдаж байна.
1996
1989 онд “Cintree”-тэй төстэй, хагас дугуй хэлбэртэй “Tank Americaine” загварыг танилцуулсны дараа илүү чөлөөт загварын, гинжин бугуйвчтай “Tank Francaise”-ийг 1996 онд гаргав. Гэрлэлтээ цуцлуулсны дараах гэрэл зургууд дээрээ Диана гүнж алтадмал загварыг нь зүүсэн харагддаг бол Мишель Обама 2009 онд тэргүүн хатагтайгаар тодорсон албан ёсны гэрэл зурган дээрээ зэвэрдэггүй ган хийцтэй “Tank Française” цагийг сонгон зүүсэн байдаг.
2012
“Cartier” компани “Tank” цувралаа “Tank Anglaise” загвараар баяжууллаа. “Francaise”-ийн шинэчилсэн хувилбар болох гурван төрлийн алтны сонголттой “Anglaise”-ийн эрчлүүрийг цагны хүрээнд шигтгэж өгсөн нь “Tank” таныг хамгаалах болно гэсэн санааг илэрхийлсэн аж.
2017
Эрин зууныг элээхдээ “Cartier” өөрийн өнгө төрхийг цогцлоосон “бүтэн хороо” “Tank” гаргажээ. Тухайлбал, зэвэрдэггүй ган хийцтэй “Tank Americaine” (5,750 ам.доллараас эхэлнэ), зүүсэн эзэндээ хүндлэл авчрах “Tank Louis Cartier” (9,750 ам.доллараас эхэлнэ), эд анги нь ил харагддаг “Tank Cintree” зэрэг загварыг дурдаж болох юм.
