АНУ-ын Техас мужийн захиргаанаас 1 сая гаруй цахилгаан автомашинд хүрэлцэхүйц цэнэглэгч станцын сүлжээг мужийн нутаг дэвсгэртээ байгуулахаар таван жилийн хугацаатай төлөвлөгөөг баталжээ.
Техасын тээврийн департментаас энэ сард гаргасан төлөвлөгөөний төсөлд эхний ээлжид улсын чанартай буюу “interstate” хурдны зам дээр, дараагаар нь хөдөө орон нутгийн замуудыг цахилгаан машин цэнэглэх станцтай болгох тухай тусгасан байна.
Түүнчлэн улсын чанартай зам дээр 50 миль буюу 80 километр тутамд, бусад бүс нутгийн замд 70 миль тутамд цэнэглэх станц байрлуулах стандартыг баримтлахаа дурдсан байна. Станц бүрийг 150кВ эрчим хүчийг хангах бөгөөд ихэнх төрлийн цахилгаан машиныг хагас цагийн дотор 10-аас 80 хувь хүртэл цэнэглэх аж.
Өнгөрсөн жил АНУ-ын Конгрессын баталсан Дэд бүтцийн хөрөнгө оруулалт ба ажлын байрны тухай хуулийн төсвөөс уг төсөл санхүүжих юм байна. Таван жилийн хугацаанд цэнэглэх станцын сүлжээ байгуулахад 408 сая ам.доллар шаардагдана хэмээн тооцоолжээ.
Харин АНУ-ын хэмжээнд 2030 он гэхэд үйлчлүүлэхэд хялбар бөгөөд найдвартай 500 мянган цэнэглэгч станцыг байгуулах зорилт тавин ажиллаж байна.
