Мягмар гарагт Microsoft компани хүний нас, хүйс болон тухайн үеийн сэтгэл хөдлөлийг тогтоодог царай таних технологийнхоо борлуулалтыг зогсоож, түүнтэй холбоотой бусад хиймэл оюун ухаант хэрэглүүрийн ашиглалтыг хязгаарлахаар болсноо мэдэгджээ. Учир нь тус технологи хүмүүсийг хэвшмэл буруу ойлголт, ялгаварлан гадуурхалтын бай болгож, зүй бусаар ашиглагдах эрсдэлтэй хэмээн тайлбарласан байна.
Өмнө нь энэ технологийг компаниуд ажил горилогчдыг ярилцлагын үеэр хянах зорилготой ашиглаж байсан тул ихээхэн шүүмжлэлд өртөж байв. Такси дуудлагын Uber компани л гэхэд гэрээт жолооч нь өөрөө машинаа барьж буйг хянахдаа Microsoft-ийн технологийг ашигладаг аж.
Царай таних системийн хиймэл оюун нь голчлон цагаан арьстай эрэгтэй хүмүүсийн мэдээллийн сангаас суралцдаг тул цаашид нийгмийн бусад бүлгүүдэд ялгавартай хандах магадлалтай гэж судлаачид үздэг байна.
Microsoft компани мэдэгдэлдээ дээрх технологийг ашиглах стандартыг боловсруулахын тулд дотооддоо болон гаднын судлаачидтай хамтран хийсэн ажлынхаа талаар дурджээ. Судалгааны үр дүнд царай таних технологи нь найдвартай байдлын хувьд ноцтой асуудалтай байсныг хүлээн зөвшөөрсөн байна.
АНУ болон Европын холбооны эрх баригчид сүүлийн үед царай таних технологийн хууль зүйн болон ёс зүйн асуудлыг идэвхтэй хэлэлцэж, зарим хязгаарлалтыг нэвтрүүлээд байгаа. Жишээлбэл Microsoft тэргүүтэй технологийн тэргүүлэх компаниуд 2020 онд хуулийн зохицуулалт гарах хүртэл цагдаагийн байгууллагыг царай таних технологиор хангахгүй гэсэн амлалт өгсөн билээ.
