Гоо сайхны бүтээгдэхүүн үйлдвэрлэлийн 90 жилийн түүхтэй Revlon компани өнгөрөгч бямба гарагт АНУ-д дампуурлаа зарласан байна. Тус компани инфляцын өсөлт, ажиллах хүчний хомсдолоос ихээхэн хохирол амссаны зэрэгцээ нийлүүлэлтийн гинжин хэлхээний саатлын улмаас бүтээгдэхүүнийхээ түүхий эдийг худалдан авч чадахааргүй болсон аж.
Өдөр тутмын үйл ажиллагаагаа хэвийн үргэлжлүүлэхийн тулд Revlon одоогийн зээлдүүлэгчдээсээ 575 сая доллар авах хэрэгтэй хэмээн тооцоолжээ.
Дээрх мэдээ гарсны дараа Revlon-ий нэгж хувьцааны ханш Нью-Йоркийн бирж дээр 13 хувиар унасан байна.
Компанийн зүгээс шүүхэд гаргасан мэдүүлэгтээ нийлүүлэлтийн гинжин хэлхээ тасалдсан нь гоо сайхны бүтээгдэхүүнд ашигладаг орц найрлагын төлөөх ширүүн өрсөлдөөнийг үүсгэсэн гэж дурджээ. Мөн компанийн нийлүүлэгчид захиалгын төлбөрөө урьдчилж авах хүсэлт гаргасныг мөн онцолсон байна. Эдгээрээс шалтгаалж бүтээгдэхүүний багцад шаардлагатай түүхий эдийн хомсдол бий болсныг тус компанийн бүтцийн өөрчлөлт хариуцсан захирал Роберт Карусо мэдэгджээ.
“Жишээлбэл, нэг ширхэг Revlon уруулын будаг үйлдвэрлэхэд 35-40 төрлийн түүхий эд болон эд анги ордог. Тэдгээрийн тус бүр нь эцсийн бүтээгдэхүүнийг зах зээлд гаргахад чухал ач холбогдолтой байдаг” хэмээн тэрбээр нэмж дурджээ.
Revlon компани нь ижил нэртэй брэндээс гадна “Elizabeth Arden”, “Almay”, “Cutex” брэндүүд, түүнчлэн Кристина Агилера, Бритни Спирс зэрэг алдартнуудын нэрийн сүрчгийг эзэмшдэг юм.
