Японы “Nippon Telegraph and Telephone Corp.” ирэх долоодугаар сараас эхлэн 30 мянга гаруй ажилтнаа зайнаас ажиллуулах нормтой болох бөгөөд тэднийг оффис дээрээ ирэхийг бизнес аялалд тооцохоор болсныг ойрын эх сурвалжаас Kyodo News агентлагт мэдээлжээ.
Шинэ журмын дагуу ажилтнууд Японы хаанаас ч ажлаа хийж болох бөгөөд оффис дээрээ ирэхэд тээврийн зардалд нь хязгаар тогтоохгүйн зэрэгцээ байрлах сууцыг нь гаргаж өгөх юм байна.
Харилцаа холбооны аварга NTT-ийн хувьд бусад компаниудын адил цар тахлын эсрэг арга хэмжээ болгож ажлын цагийн өөр хэв маягийг нэвтрүүлээд байв. Харин ажиллах хүчний хомсдолтой өнөө үед чадварлаг боловсон хүчнээ авч үлдэхийн тулд ажиллах орчин болон ажлын цагийн илүү уян хатан нөхцөлийг санал болгож буй нь энэ юм.
Хуучин барааны цахим худалдааны Mercari Inc. болон портал сайт хөгжүүлэгч Yahoo Japan Corp. зэрэг компаниуд дээрхтэй төстэй схемийг хэрэгжүүлж, ажилтнууддаа Японы хаана ч ажиллаж, амьдрах боломжийг олгоод байгаа аж.
Гэхдээ зарим томоохон компаниуд ажилтнуудаа оффис дээр заавал ирүүлэх бодлого баримталж байна. Жишээлбэл Tesla-ийн гүйцэтгэх захирал Илон Маск ажилтнууддаа долоо хоногт дор хаяж 40 цагийг оффис дээр өнгөрүүлэх, эс бөгөөс ажлаасаа гарах сонголтыг өгсөн билээ.
Мөн авто үйлдвэрлэгч Honda Motor, цахим худалдааны Rakuten компаниуд цар тахлын нөхцөл байдал дээрдсэн гэсэн шалтгаанаас зайнаас ажиллах хуваарийг зогсоогоод байгаа юм.
