“Microsoft” компанийн хамтран үүсгэн байгуулагч, тэрбумтан, сайн үйлстэн, Билл Гейтс өөрийн санал болгох номуудын жагсаалтыг жил бүр уламжлал болгон блогтоо оруулдаг. Түүний энэ зун санал болгож буй номуудад уур амьсгалын өөрчлөлт, жендерт суурилсан эрх мэдлийн ялгаа, улс төрийн хуваагдлын сэдэвтэй бүтээлүүд багтжээ.
1. Вацлав Смил – “How the World Really Works”
Билл Гейтсийн дуртай зохиолчдын нэг, Канадын хүрээлэн буй орчны эдийн засагч Вацлав Смилийн энэхүү номд даяаршил, мэдээлэлд суурилсан өнөөгийн эдийн засагт хүний оршин тогтнох чадвар, үр ашгийг тодорхойлдог долоон үзэгдлийг тайлбарлажээ. Зохиолч дэлхийн хөдөө аж ахуй, эрчим хүч, үйлдвэрлэлийн сүлжээ, түүнчлэн тэдгээр нь нийгмийн үйл ажиллагаатай хэрхэн холбогддог, байгаль орчинд хэрхэн нөлөөлдөг тал дээр хийсэн олон жилийн судалгаагаа энэхүү номдоо нэгтгэн бичсэн гэхэд болно.
2. Амор Таулес – “The Lincoln Highway: A Novel”
“Нэг л сэдвийг барьж аваад бичээд байдаггүй, бусад агуу зохиолчдын адил олон төрлийн авьяастай” хэмээн Билл Гейтс зохиолч Амор Таулесийг магтжээ. Энэхүү роман таныг 1950-иад оны Америк дахь Линкольн нэртэй хурдны замаар адал явдал дүүрэн аялалд авч гарах болно. Санаандгүй аллагын гэмт хэргээр 15 сарын ял эдлээд суллагдсан Эмметт хэмээх өсвөр насны өнчин хүү шинэ амьдрал эхлүүлэхийн тулд найман настай дүүгээ дагуулан Калифорни руу замд гарснаар үйл явдал эхэлдэг.
Уг романы дүрийн хөгжүүлэлт, олон талаас харсан өгүүлэх өнцөг нь Билл Гейтсд онцгой таалагдсан бөгөөд “хувийн аялал гэдэг хэзээ ч хурдны зам шиг шулуун, нэгэн хэвийн байдаггүйг ойлгуулсан ном” хэмээжээ.
3. Эзра Клейн – “Why We’re Polarized”
“New York Times”-ийн нийтлэлч, подкастын хөтлөгч Эзра Клейний шинэ номыг өнөөгийн Америкийн улс төрийг тодорхойлж буй сүргийн сэтгэхүйг сэтгэл судлалын талаас төгс тайлбарласан бүтээл хэмээн Билл Гейтс тодорхойлжээ. Хоёр талд хуваагдсан туйлшралын тэргүүн шалтгаан болох улс төрийн ондоошил хэмээх ойлголт нь сүүлийн 50 жилд арьс өнгө, бүс нутаг, үзэл суртлын онцлогтой нэгдэж, цаашлаад улс төрийн байгууллагуудад нөлөөлснийг Клейн энэ номдоо тод томруун харуулсан байна.
4. Ким Стэнли Робинсон – “The Ministry for the Future”
Энэхүү роман дээр гардаг “Ирээдүйн төлөөх яам” гэдэг нь уур амьсгалын өөрчлөлтийн эсрэг олон улсыг нэгтгэсэн Парисын гэрээг хэрэгжүүлэх үүрэг бүхий зохиомол байгууллага юм. Зохиолчийн хувьд ирээдүйг аврах шинжлэх ухаан, улс төрийн хариуцлага, санаачилгуудыг үргэлжилсэн үг болгон буулгажээ. Энэтхэгийн Уттар Прадеш мужид нүүрлэсэн ган гачиг, үерийн гамшиг 20 сая хүний аминд хүрч буйгаар уг романы үйл явдал эхэлдэг.
5. Наоми Алдерман – “The Power”
Эмэгтэйчүүд гэнэт өөрийн биеэсээ цахилгаан ялгаруулдаг супер хүчтэй болчихвол юу болохыг Наоми Алдерманы “The Power” номд өгүүлдэг. Төрөл бүрийн нийгмийн байгуулал, хүрээлэлд өөр өөр туршлага хуримтлуулсан гурван эмэгтэй, нэг эрэгтэйн түүхээр дамжуулан Алдерман илүү эрх тэгш дэлхийг бий болгох итгэл найдвар, мөн эрх мэдлийг хэтрүүлэн ашигласнаар юунд хүрэх тухай сэдвийг хөнджээ.
