2026 онд Хойд Америкийн гурван улсад зохион байгуулагдах хөл бөмбөгийн дэлхийн аварга шалгаруулах тэмцээний тоглолтуудыг хүлээн авах 16 хотын нэрийг FIFA-аас тодруулжээ. Үзэгчид дэлхийн спортын хамгийн том тэмцээнийг АНУ-ын 11, Мексикийн гурав, Канадын хоёр хотод үзэхээр болсон байна.
Тоглолт болох хотуудыг FIFA газар зүйн байршлаар нь бүсчлэн хувааж тодруулжээ. Баруун бүсэд Америкийн Лос-Анжелес, Сиэтл, Сан-Франциско болон Мексикийн Гуадалахара, Канадын Ванкувер хотууд багтжээ. Харин төвийн бүсэд Атланта, Канзас-Сити, Хьюстон, Даллас, мөн Мексикийн Мехико, Монтеррей хотыг оруулжээ. Эцэст нь зүүн бүсэд Нью-Йорк (Нью-Жерси), Филадельфи, Майами, Бостон, Торонто хотууд тоглолт хүлээн авахаар болсон байна.
Эдгээрээс нээлтийн тоглолт болон финалын тоглолт зохион байгуулагдах хотуудыг хожим зарлах аж.
ДАШТ-тэй холбоотой эдийн засгийн үйл ажиллагаанаас дээрх хотууд 90 саяас 480 сая ам.долларын орлого олох боломжтойг АНУ-ын хөл бөмбөгийн холбооноос мэдэгджээ.
2026 оны ДАШТ нь гурван улсын хамтран зохион байгуулж буй анхны ДАШТ болохоос гадна явагдах форматын хувьд өмнөх тэмцээнүүдээс ихээхэн ялгаатай байх юм. Жишээлбэл оролцох шигшээ багуудын тоо өмнөхтэй адил 32 бус 48 байх тул хасагдах шатны тоглолтыг тэгшитгэх үүднээс багуудыг гурав гурваар нь 16 хэсэгт хуваана. Ингэснээр хэсэг тус бүрээс хоёр баг дараагийн шатанд шалгарч, шөвгийн 32 багийн өрсөлдөөн эхлэх ажээ.
1994 онд АНУ хөл бөмбөгийн ДАШТ-ийг зохион байгуулж байсан бол Мексик улс 1970, 1986 онуудад хоёр удаа зохион байгуулж байжээ. Харин Канад улсын хувьд энэ тэмцээнийг 2026 онд анх удаа хүлээн авах юм.
