Италийн далайн эргийн нарлаг Наполи хотоос 13 километрийн зүүн хойд зайд орших Касалнуовог оёдолчдын тосгон гэж нэрлэдэг. Учир нь уг тосгоны 50 мянган оршин суугчийн тэн хагас нь мэргэжлийн оёдолчид. Хувцас загвар, ур ухаанаар “амьсгалсан” уг тосгонд 70 орчим жилийн өмнө төрсөн “Isaia” брэнд эдүгээ тансаг зэрэглэлийнг эрэгтэй хувцасны зах зээлийн томоохон тоглогчдын нэг болжээ. Исаиагийн гэр бүлийн гурван үеийн үнэ цэн, хүсэл тэмүүллийг шингээсэн уг брэндийн төв оффис одоо ч Касалнуово тосгонд бий.
“Isaia” брэндийн үүсгэн байгуулагч Энрико Исаиа анх Наполи хотын оёдолчдод сайн чанарын даавуу нийлүүлдэг байсан ч 1957 оноос эхлэн хослол урлах болжээ. Тус брэндийн борлуулалт хариуцсан захирал Энцо Магарачи “Намайг анх нэгдэхэд “Isaia” Милан хотод ганцхан дэлгүүртэй, олон нийтэд бүрэн танигдаж амжаагүй орон нутгийн брэнд байсан. Харин ажиллаж эхэлсний дараа энэ брэндийн загвар, ур хийц, даавуу материал, онцгой байдалд нь өөрийн эрхгүй дурласан. Энэ брэндийг бөөнөөр үйлдвэрлэдэг хувцастай харьцуулах боломжгүй урлагийн бүтээл юм” гэж өгүүлэв.
Зөвхөн хослол, хүрэм, цув урладаг байсан “Isaia” сүүлийн арваад жил зах зээлээ маш хурдацтай тэлж, бүтээгдэхүүний нэр төрлөө ч баяжуулснаар олон улсын брэнд болж чадсан юм. Цамц, жинс, богино цамц, арьсан гутал, углааш гээд л бүх төрлийн чөлөөт болон спорт хувцас үйлдвэрлэх болсон тус брэнд дэлхий даяар хорин салбар дэлгүүр, 200 орчим тусгай дэлгүүртэй бөгөөд АНУ, Канад болон Японд томоохон зах зээлтэй болсон юм. “Бид олны танил нэг ч алдартанд мөнгө төлж хувцсаа сурталчлуулдаггүй боловч улаан шүрэн логотой “Isaia” брэндийн хослол Холливудын улаан хивсийг чимэх нь өдрөөс өдөрт нэмэгдсээр байна”.
Нээснээс хойш долоон жилийн дотор тасралтгүй өргөжин тэлж, үнэнч үйлчлүүлэгчидтэй болж байгаа “Isaia” брэндийн Улаанбаатар дахь салбараараа бахархдаг хэмээн ноён Магарачи нэмж хэлсэн юм. Цар тахал дэгдэхээс өмнө дэлхийн өнцөг булан бүрт орших үйлчлүүлэгчдэдээ шинэ цуглуулгаа танилцуулах, саналыг нь хүлээн авах, биеэс нь хэмжээ авах зэрэг үйлчилгээг үзүүлдэг транк шоуг улирал бүр зохион байгуулдаг байсан ч хоёр жил өнжсөний эцэст ахин Монголын үйлчлүүлэгчидтэй уулзахаар тэрбээр мастер эсгүүрчин Массимо Зологийн хамт хүрэлцэн ирсэн юм.
2022 оны хавар зуны цуглуулга Наполийн хаант улс сэдэвтэй аж. Италиас өмнө байсан эртний энэ гүрэнд хөл бөмбөг үүссэн гэж үздэг ба домогт тамирчин Марадона ч мөн Наполи хотоос гаралтай. Тиймээс шинэ цуглуулгын бүтээгдэхүүнүүд маш өнгөлөг, гэгээлэг, шинэлэг шийдэл бүхий өөртөө итгэлтэй, эгэл бус байдлыг эрэлхийлэгч эрхмүүдэд зориулагдсан байна.
Зуны нар, далайн эрэг, улаан лооль, амтат паста, пицца, уран баримал, тосон зураг гээд л Итали соёл, урлагийг төлөөлж болох бүхнийг загварууддаа шингээдэг “Isaia” зөвхөн өөрийн бүтээгдэхүүнд зориулсан дахин давтагдашгүй даавуу үйлдвэрлэдгээрээ бусад брэндээс ялгардаг. Тэд тун саяхан даавуу урлалаар алдартай Италийн Биелла хотод шинэхэн нэхмэлийн үйлдвэртэй болсон тул цаашид дотоод хэрэглээнээсээ гадна “Dolce Gabanna”, “Gucci”, “Hermès” зэрэг тансаг брэндэд түүхий эд нийлүүлэх аж.
“Isaia” хослолуудаа торго, ноолуур, ноос, зотон, хөвөн даавуу гээд хольцгүй, цэвэр даавуугаар урладгийг байнгын үйлчлүүлэгчид нь андахгүй. Хэрэв хүсвэл зөвхөн Перу улсын Андын нуруунд амьдардаг викуня гэх амьтны эрүү хэсгийн ноолуураар нэхдэг маш ховор, тансаг даавуугаар зөвхөн өөрт зориулсан хорвоод цор ганц хослол хийлгэх боломж Монголын хэрэглэгчдэд бий хэмээн ноён Магарачи өгүүллээ.
О.АГИЙМАА
