Германы шар айраг үйлдвэрлэгчид бүтээгдэхүүнээ савлах лонхны нөөцгүй болсон тул хэрэглэсэн лонхоо буцаан тушаахыг худалдан авагчдаас хүсэх болсныг The New York Times мэдээлжээ.
Эрчим хүчний үнийн өсөлт шилний үйлдвэрлэлд ихээр нөлөөлсөн, түүнчлэн Германы үйлдвэрлэгчдийг шилээр хангадаг Украин улс дайнд нэрвэгдсэн нь үүний шалтгаан аж.
“Украин дахь шилний хэд хэдэн үйлдвэр Оросын дайралтад өртөн сүйрч, эсвэл хаагдахад хүрсэн тул Баруун Европ руу нийлүүлэх боломжгүй болсон нь харамсалтай хэрэг. Үүний улмаас Германд шилэн бүтээгдэхүүн, шилэн савны эрэлт нэмэгдсэн” хэмээн Германы шар айраг үйлдвэрлэгчдийн холбооны ерөнхий менежер Холгер Айхеле өгүүлжээ.
Түүнчлэн нийлүүлэлтийн гэрээгүй шар айргийн үйлдвэрүүд лонх худалдан авахдаа өнгөрсөн жилийнхээс 80-90 хувиар илүү үнэ төлж буйг дурдсан байна. Энэ мэтээр нийлүүлэлтийн гинжин хэлхээг саадгүй явуулахад хүндрэл учирсан ч шар айргийн үйлдвэрлэлийн хэмжээг хязгаарлах төлөвлөгөө байхгүй гэдгээ мөн мэдэгджээ.
Хэрэглэгчдэд лонхоо буцаан тушаах сэдэл өгөхийн тулд үйлдвэрүүд Германы хадгаламжийн системийг ашиглаж эхэлжээ. Тодруулбал худалдан авагч дэлгүүрээс лонхтой шар айраг авахдаа 8-15 центийн барьцаа нэмж төлөх бөгөөд дараа нь лонхоо тушаахдаа түүнийгээ ихэвчлэн ваучер хэлбэрээр буцаан авах боломжтой аж.
