Гольфийн спортын бэлгэ тэмдэг Тайгер Вүүдс албан ёсоор тэрбумтан болсныг “Forbes” зарлажээ. Ингэснээр тэрбээр NBA-ийн одод болох Майкл Жордан, Леброн Жэймс нарын хамт дэлхийн спортын салбараас төрсөн гурван тэрбумтны нэг нь болж байна.
Өнгөрөгч баасан гарагт “Forbes”-ийн тооцооллоор түүний нийт хөрөнгийн хэмжээ 1 тэрбум ам.долларыг давжээ. Тэрбээр мэргэжлийн гольфийн тамирчдын дунд хамгийн өндөр буюу нийт 121 сая ам.долларыг шагнал болгон авснаас гадна карьерынхаа оргил үед “Forbes”-ийн хамгийн өндөр орлоготой тамирчдын жагсаалтыг 10 жил дараалан тэргүүлж байв.
Гэхдээ Вүүдсийн карьерын нийт орлогын 10 хүрэхгүй хувийг спортын ялалтууд нь бүрдүүлжээ. Ихэнх хөрөнгө нь “Nike”, “Gatorade”, “Rolex” ,”Monster Energy” зэрэг брэндүүдтэй хийсэн гэрээ, суртачилгаанаас орж ирсэн аж.
Эдгээрээс гадна Вүүдс хувийн төрөлжсөн бизнес эрхэлж багагүй амжилт олжээ. Жишээлбэл гольфийн талбайн дизайн гаргадаг компани болон амьд тоглолтын продакшн компани түүний мэдэлд байдаг. Мөн тэрбээр улс дамнасан зочид буудлын хөгжүүлэлт, үл хөдлөх хөрөнгийн менежментийн компани болох Nexus Luxury Collection-ий хувьцаа эзэмшигч юм.
Харин спортын карьерын хувьд тэрбээр 2021 оны хоёрдугаар сард автомашины осолд орж, хөлөө маш хүнд бэртээснээс хойш талбайдаа эргэн ирж, формдоо орохыг хичээж байна. Мягмар гарагт Вүүдс US Open тэмцээнд оролцож чадахгүй болсноо мэдэгдсэн бол түүнээс өмнө “Masters” болон “PGA Championship” тэмцээнийг өнжөөд байсан билээ.
Мэргэжлийн түвшинд тоглож эхэлснээсээ хойш Тайгер Вүүдс томоохон тэмцээнүүдэд 15 удаа түрүүлж, Жэк Никлаусын 18 түрүүлсэн амжилттай тун ойртжээ. Мөн “PGA”-ийн цуврал тэмцээнд 81 удаа түрүүлсэн нь тус спортын түүхэнд хоёрдугаарт бичигдэх амжилт юм.
