Япон хотуудын нарийн гудамжинд зориулагдсан бяцхан хэмжээтэй “кей” ангилалд хамаарах нэгэн шинэ машиныг “Nissan” компани танилцуулжээ. Цахилгаан хөдөлгүүртэй “Sakura” нь ердөө 340 см урттай тул Японы замын хөдөлгөөнд оролцох тээврийн хэрэгслийн хэмжээний шаардлагыг дөнгөж хангахаар аж.
Уг машины дан цахилгаан хөдөлгүүр нь 63 морины хүч, 195 ньютон-метр мушгих хүчтэй. Жин нь 1070 кг бөгөөд дээд хурд нь 130 км/цаг юм байна. Мөн 20.0 кв/цагийн багтаамжтай батарей нь нэг цэнэглэлтээр 180 км явах чадалтай аж.
“Sakura”-ийн гол давуу тал гэвэл ердөө 4.7 метрийн эргэлтийн радиустай учир маневр маш сайн, түүнчлэн жолоочид туслах ProPilot систем, нэг педаль бүхий жолоодлогын горим, зогсоолд байрлуулах автомат функцээр тоноглогджээ.
Салоны хувьд 9 инчийн энтертаймент дэлгэц, 7 инчийн дижитал хянах самбартай. “Sakura” машин энэ зун 15 өнгөний сонголттойгоор зөвхөн Японы зах зээлд 14 мянган долларын үнээр худалдаанд гарах аж.
