Карьерын бүхий л шатанд явж буй нас насны эмэгтэй энтрепренерүүд, манлайлагчдын заавал унших хэрэгтэй шилдэг номуудаас танилцуулж байна.
1. “LEAN IN” – ШЕРИЛ САНДБЕРГ
“Facebook”-ийн үйл ажиллагаа эрхэлсэн захирал асан, “Leanin.org”-ийн үүсгэн байгуулагч Шерил Сандбергийг “Time” сэтгүүл 2012 хамгийн нөлөө бүхий 100 хүний нэгээр тодруулсан байдаг. Тэрбээр 2010 онд “TEDTalk”-д эмэгтэйчүүдийн манлайллын тухай илтгэл тавьсны дараа дэлхийн өнцөг булан бүрд амьдардаг эмэгтэйчүүд өөрсдийн амжилт болон бүтэлгүйтлийн түүхээ хуваалцсан нь түүнд “Lean In” номоо бичих урам зоригийг өгсөн аж. Шерил Сандберг анхны номондоо хэрхэн өөрийн хил хязгаарыг эвдэж, хүмүүсийн төсөөллөөс давж чадсан тухайгаа бичсэн бөгөөд энэхүү ном нь энтрепренер гэлтгүй эмэгтэй хүн бүрийн зайлшгүй унших номын жагсаалтад багтдаг юм.
2. “SHARK TALES”- БАРБАРА КОРКОРАН
Бизнесийн гараагаа эхлүүлж буй эмэгтэй хүн бүрийн зайлшгүй унших ёстой номын нэг. Зохиолч Барбара Коркоран найз залуугаасаа 1,000 ам.доллар зээлэн, Нью-Йорк хотод үл хөдлөх хөрөнгө борлуулалтын өөрийн бяцхан оффисоо нээж буйгаар тус ном эхэлнэ. Тэрбээр үл хөдлөх хөрөнгийн зах зээлд эрчүүд ноёрхож байсан үед хэрхэн өөрийн байр суурийг эзэлж, зургаан тэрбум ам.доллараар үнэлэгдэх бизнес босгосон талаараа тус номондоо дэлгэрэнгүй өгүүлдэг аж. “Shark Tales”-ийг уншсаны дараа та “Тэр хийж чадсан юм бол яагаад би чадахгүй гэж” хэмээн бодно гэдэгт итгэлтэй байна.
3. “GIRL ON FIRE” – КАРА ЭЛВИЛЛ ЛЕЙБА
Бизнесийн ертөнц асар хурдацтайгаар өөрчлөгдөж буй энэ үед эмэгтэй энтрепренерүүд уламжлалт сэтгэлгээ, хайрцагласан дүрэм журмаас илүүтэйгээр өөрсдийн зөн совин, итгэл үнэмшилдээ хөтлөгдөн мөрөөдлөө биелүүлэх боломжтой болжээ. Тус ном нь уламжлалт байдал, дүрэм, журамд захирагдахаас залхсан эмэгтэй хүн бүрд зориулагдсан гэж хэлж болно. Зохиолч Кара Элвилл Лейба нь манлайлагч эмэгтэй бөгөөд хэн нэгэн чамайг анзаарахыг хүлээж суухынхаа оронд өөрийн дүрмийг зохиож, хүсэл мөрөөдлийнхөө төлөө ямар нэгэн зүйл хийж бүтээхийг энэхүү номоороо уриалжээ.
4. “DIGITAL GODDESS” – ВИКТОРИЯ МОНТГОМЕРИ БРАУН
Өнөөдөр эмэгтэйчүүд эрчүүдээс илүү гарааны бизнес эхлүүлэх болсон ч тэдний хувьд тоглоомын талбай нь үргэлж шударга, таамаглаж болохуйц байдаггүй. Хөрөнгө оруулалт татах, бизнес уулзалт хийх зэрэг эмэгтэй энтрепренерүүдэд тулгамддаг түгээмэл асуудлын тухай өгүүлэхийн зэрэгцээ хамтрагчтайгаа хэрхэн тохиролцох зэрэг энгийн асуултад ч хариулт өгөх болно. Мултимедия веб портал “Big Think”-ийг үүсгэн байгуулагч Виктория Монтгомеригийн түүх бүх насны энтрепренер эмэгтэйчүүдэд зориулагдсан аж.
5. “THRIVE” – АРИАННА ХАФФИНГТОН
Уг номын зохиолч Арианна Хаффингтон нь асар хурдан хөгжиж буй “Huffington Post Media Group”-ийн ерөнхийлөгч, ерөнхий эрхлэгч бөгөөд өнөө цагийн хамгийн нөлөө бүхий эмэгтэйчүүдийн тоонд зүй ёсоор багтдаг нэгэн. Уламжлалт хэмжүүрээр бол эргэлзээгүй амжилттай яваа эмэгтэй гэж хэлж болно. Гэвч стресс, нойргүйдэл, хэт ачааллаас үүдэн эрүүл мэндийн асуудлууд гарч эхлэхэд тэрбээр “Энэ үнэхээр амжилт мөн үү?” хэмээн өөрөөсөө асууж, өөрийн амьдралын үнэ цэнийг эргэн харах болжээ. Тус номоороо дамжуулан зохиолч ажил, амьдрал, сэтгэлгээний өөрчлөлтөд таныг хөтөлнө.
6. “DEAR FEMALE FOUNDER” – ЛУ ЛИ
Топ энтрепренер гэхээр хүн бүрийн бодолд Ричард Брансон, Илон Маск, Марк Закерберг ордог. Гэвч тэдгээртэй зэрэгцэн амжилттай яваа эмэгтэйчүүдийн тухай асуувал чухам хэнийг онцлон хэлэх вэ? Тэгвэл тус номонд нэг тэрбум ам.долларын ашиг орлоготой 66 эмэгтэй энтрепренерийн туулсан замнал хийгээд шинэ үеийнхэнд өгөх зөвлөмжийг багтаажээ. Тэдний зарим нь хэвлэл мэдээллийн салбараас төрөн гарч, аль хэдийн олны танил болсон бол заримынх нь тухай та сонсож ч байгаагүй гэдэгт итгэлтэй байна. “Dear Female Founder” ном “Амжилттай яваа эмэгтэй энтрепренер болон хөрөнгө оруулагчид хойч үедээ зориулан захидал бичвэл тэр нь юун тухай байх вэ?” хэмээх цор ганц асуултын хариултад суурилсан аж.
7. “THE MOMENT OF LIFT” – МЕЛИНДА ГЭЙТС
“Bill and Melinda Gates Foundation” –ы хүрээнд хандив, тусламжийн үйл хэрэгт 20 гаруй жил биечлэн оролцохдоо Мелинда Гэйтс нийгмийг сайжруулахын тулд эмэгтэйчүүдэд хөрөнгө оруулах зайлшгүй шаардлагатай гэдгийг ойлгосон гэдэг. Олон жилийн турш Билл Гэйтсийн арын албаны ажлыг зохицуулдаг байсан тэрбээр хэрхэн дэлхийн хамгийн нөлөө бүхий эмэгтэй болсон тухай энэхүү номонд өгүүлнэ. Түүнчлэн зохиолч тус номоороо дамжуулан эмэгтэйчүүдийг хүчирхэгжүүлж, хүйсийн тэнцвэртэй байдлыг хангахыг уриалдаг.
8. “#GIRLBOSS” – СОФИЯ АМОРУСО
Зохиолч София Аморусо өсвөр насаа замын унаа, хогийн цэг орчмоор эргэлдэн өнгөрүүлсээр 22 насандаа сургуулиа хаясан, дампуурлын ирмэгт тулсан нэгэн болж хувирсан байв. Тэрбээр амь зогоохын тулд урлагийн сургуулийн зааланд үнэмлэх шалгагч хийж байх үедээ “Ebay”-д хуучин хувцас зарж эхэлсэн нь түүний амьдралыг өөрчилжээ. Софияг өөр ямар ч босстой харьцуулах боломжгүй. Түүнийхээр амжилт бол төгссөн сургууль, эзэмшсэн мэргэжлээр хэмжигдэхгүй, харин өөрийн мэдрэмждээ хөтлөгдөн амжилтын зам харгуйг бий болгох, өөрийн дүрмийг зохиоход орших аж.
