Гурван жилийн өмнө дэлхийг байлдан дагуулж байсан “Joker” уран сайхны киноны үргэлжлэл бүтээгдэж эхэлснийг, түүнчлэн шинэ анги нь “Joker: Folie à Deux” нэртэй байхыг найруулагч Тодд Филлипс зарласан байна.
Жүжигчин Жоакин Фениксийн гол дүрд нь тоглосон эхний “Joker”-ийг найруулсан Тодд Филлипсийн хувьд шинэ ангийн зохиолыг бичих ажил дээр Скотт Силвертэй дахин хамтарч байгаа аж. Тэрбээр кино зохиолын хавтасны зураг болон Жоакин Фениксийн тус зохиолыг уншиж буй зургийг инстаграм хаягтаа нийтэлжээ.
Хэдий зохиолын үйл явдал тодорхой бус ч Folie à Deux гэдэг нь хоёр ба түүнээс олон хүнд ижил төрлийн сэтгэцийн эмгэг илрэхийг хэлдэг франц нэр томьёо юм байна.
2019 онд гарсан “Joker” кино нь Бэтмэний кинонуудад гардаг үйл явдлаас тусдаа, бие даасан өрнөлтэй бүтээл юм. Готам хотод алиалагчийн ажил хийдэг, ганцаардмал амьдралтай Артур Флек юунаас болж, хэрхэн Joker болж хувирч байгааг өгүүлдэг. Түүнчлэн найруулагч Мартин Скорсезегийн “Taxi Driver”, “The King of Comedy” киноны санаа, элементүүд тус кинонд гүнзгий шингэсэн байдаг.
Өмнө нь Warner Bros. компани “Joker”-ийн үргэлжлэлийг бүтээхээр Тодд Филлипстэй гэрээ хийсэн тухай мэдээлэл гарсан ч тэрбээр шинэ ангийн санааг бодож олохын тулд цаг хугацаа хэрэгтэй болохоо мэдэгдэж байв. Мөн эхний киноны ерөнхий сэдэв, символизмоос зөрөхөөргүй санаа олж чадахгүй бол уг төслийг орхих болохоо дурдаж байжээ.
