Энэ жил Ирак улсад олон сарын турш үргэлжилсэн ган гачгийн улмаас томоохон нуур ширгэхэд эртний хотын үлдэгдэл усан доороос ил гарч ирсэн сонирхолтой үйл явдал болжээ.
Нуурын усны түвшин хурдацтай доошлох үед Герман болон Курдийн археологичид ёроолд нь суурин газрын туурь байгааг илрүүлжээ. Уг олдвор нь өнөөгийн Иракийн нутагт МЭӨ 1550-1350 оны хооронд оршин тогтнож байсан Миттанийн эзэнт гүрний чухал хотуудын нэг, Тигр мөрний эрэг дээрх Захику хэмээх хотын туурь мөн хэмээн судлаачид үзэж байна.
Наранд хатаасан ердийн шавар тоосгоор барьсан хотын барилгын хананууд маш сайн хадгалагдаж үлдсэн байсан нь археологичдыг хамгийн ихээр гайхшруулжээ. МЭӨ 1350-иад оны үед хүчтэй газар хөдлөлтөөс болж тус хот сүйрсэн гэж үздэг бөгөөд тухайн үед хананы дээд хэсгүүд нь нуран унаснаар хот бүрэн далдлагдан өдийг хүрсэн бололтой.
Харин одоогоос 40-өөд жилийн өмнө бүс нутгийн усан хангамжийг нэмэгдүүлэх үүднээс Тигр мөрөнд Мосулын даланг барьсны дараа дээрх нуур үүссэн тул Захикугийн туурь усан доор оржээ.
Археологчдын баг богино хугацааны дотор хотын ихэнх хэсгийн зохион байгуулалтыг харуулсан газрын зураг бүтээж, цамхаг, өндөр хана бүхий бэхлэлт, том хэмжээтэй агуулах зэргийг илрүүлсэн байна. Үүнээс гадна хүрэл зэвсгийн үед Тигр мөрний эрэгт амьдрал ямар байсныг гэрчлэх эд өлгийн зүйлс олдсон байна. Жишээлбэл 5 ширхэг шаазан тогоо дотор эртний шаантаг бичээс бүхий 100 гаруй шавар хавтан хадгалсан байсныг олжээ.
