Хятадын тэрбумтан Жэк Магийн удирддаг санхүүгийн технологийн компани “Ant Group” Сингапур улсад арилжааны цахим банк нээхээр болсноо даваа гарагт зарлажээ.
Энэхүү алхам нь Ханьжоу хотод төвтэй тус финтекийн аваргын гадаадын зах зээлд хүрээгээ тэлэх бодлогын нэг хэсэг болж байна. 2020 оны сүүлчээр “Ant Group”-ийн IPO гаргах үйл ажиллагааг гэнэт таслан зогсоосноос хойш тэдний Хятадад төвтэй бизнесүүд байнга төрийн зохицуулалтын дарамт шахалтад байгаа юм. 2021 онд тус компани Хятадын төв банк болох Ардын банкны шууд хяналт бүхий санхүүгийн холдинг компани болохоор зөвшөөрч, саяхан удирдах зөвлөлөө шинэчилсэн билээ.
Харин Сингапурт нээгдэж буй тус компанийн бүрэн эзэмшлийн “ANEXT Bank” нь бүс нутгийн жижиг дунд аж ахуйн нэгжүүд, ялангуяа хил дамнан үйл ажиллагаа явуулдаг байгууллагуудыг санхүүгийн үйлчилгээгээр хангах юм байна. Өмнө нь Сингапурын DBS банкны гүйцэтгэх захирал байсан То Сун Вэй тус банкийг удирдах бөгөөд одоогийн байдлаар хос мөнгөн тэмдэгтээр гүйлгээ хийдэг ANEXT бизнесийн дансыг харилцагчдад танилцуулж байна. Харин энэ оны гуравдугаар улиралд албан ёсны үйлчилгээгээ эхлүүлэх аж.
