1985 онд гарсан “Ирээдүй рүү буцсан нь” кино тухайн үед татан буугдаад байсан “DeLorean Motor Company”-ийг авто ертөнцөд эргүүлэн авчирсны зэрэгцээ тэдний үйлдвэрлэсэн өргөгддөг хаалгатай спорт машиныг поп соёлын бэлгэ тэмдэг болгож байсан билээ. Тэгвэл өдгөө DMC нүүрстөрөгч ялгаруулдаггүй машинуудын “уралдаан”-д байр сууриа эзэлж, дээрх статусаа дахин олж авахыг хичээж байна.
Өдгөө Техас мужийн Сан-Антонио хотод шинэ эзэмшигчтэй болсон DMC компани “DeLorean” нэрийг авч явах дараагийн машин болох бүрэн цахилгаан хөдөлгүүртэй “Alpha 5”-ийг танилцуулжээ. “Дөчөөд жилийн турш дэлхийн өнцөг булан бүрийн хүмүүст нөлөөлж, дурсамжид нь үлдэж чадсан брэндийг дахин шинэчилж, түүхэнд нь шинэ хуудсыг нээх боломж бидэнд ирсэн” хэмээн тус компанийн брэнд хариуцсан дэд захирал Нейло Харрис өгүүлжээ.
80-аад оны үед “DeLorean Motor Company” дээшээ нээгддэг хаалгатай седан загварын машиныг хөгжүүлж эхэлсэн боловч зах зээлд гаргахаасаа өмнө дампуурсан аж. Азаар “Ирээдүй рүү буцсан нь” киноны бүтээгчид тус машиныг зураг авалтад ашиглах санал тавьсан байна.
Шинэчлэгдсэн “DeLorean” нь анхны загварын ерөнхий хэлбэрийг хадгалж үлдсэн ч хэрэглээний тал дээр сайжруулалт хийж, хоёр байсан суудлын тоог дөрөв болгожээ. Үзүүлэлтийн хувьд 250 км/цаг хүртэл хурдлах боломжтой, гурван секундийн дотор 100 км/цагийн хурд авах чадалтайг компанийн зүгээс дурдсан байна. Түүнчлэн нэг цэнэглэлтээр 480 км зайг туулах 110 киловатт цагийн хүчин чадалтай батарейгаар тоноглогджээ.
“Alpha 5”-ийн үнийн мэдээллийг одоогоор дэлгээгүй байгаа ч өрсөлдөөн ихтэй, оролцогч олонтой зах зээл тус компанийг хүлээж байгаа нь тодорхой юм. Энэ наймдугаар сард Калифорнид “Pebble Beach Concours d’Elegance” арга хэмжээн дээр “Alpha 5”-ийн нээлтийг хийхээр төлөвлөжээ.
