Подкаст шоуны эрэлт нэмэгдэх тусам сонсогч өөрөө ярилцагчидтай хамт нэг өрөөнд байгаа мэт бодит мэдрэмжийг төрүүлэх шинэ арга, технологийг контент бүтээгчид эрэлхийлэх болжээ.
Норвеги улсад төвтэй “Nomono” нь подкаст бүтээгчид, сэтгүүлчдийн ярилцлагад зориулсан дуу бичлэгийн хэрэгсэл, төхөөрөмж үйлдвэрлэдэг. Аудун Солванг, Ионас Ринде нарын 2019 онд үүсгэн байгуулсан тус компани “SINTEF Digital”, “Skyfall Ventures”, “Spintop Ventures” зэрэг фирмүүдээс хөрөнгө оруулалт аваад байна.
Тэгвэл энэ долоо хоногт “Nomono” компани дуу бичлэгийн ажлыг технологи, боловсруулалт, хяналт гээд бүх үйл явцтай нь хамт шийдсэн төхөөрөмж болон програм хангамжийн багц бүтээгдэхүүнээ танилцуулжээ.
Тус багцад WiFi холболтоор ажилладаг, орчны чимээг 360 хэмээр бичдэг “Nomono Sound Capsule” дуу хураагч, дөрвөн ширхэг энгэрийн микрофон, цэнэглэгчтэй гэр багтжээ. Эдгээр нь нийлээд ердөө 2 кг жинтэй тул авч явах, хэрэглэхэд маш авсаархан аж.
Мөн дуу хураагчтай шууд холбогдон ажилладаг “Nomono’s Web App”-ыг ашиглан контент бүтээгчид дуу бичлэгээ хадгалах, продакшны багтай харьцах, хиймэл оюун бүхий хэрэглүүрийг ашиглан чанарын хяналт хийх зэргээр ажлаа хөнгөвчлөх боломжтой.
Өнөө цагт мэргэжлийн түвшинд подкаст хийхэд дуу хураагч, микрофон, миксер, хадгалах төхөөрөмж зэргийг тусад нь бэлдэж, урьдчилан тохируулга хийх шаардлагатай байдаг. Тэгвэл “Nomono” нь дээрх бүгдийг ганцхан товчлуур дараад хийх боломжтой болгосны зэрэгцээ бичлэгийг үүлэн технологид суурилсан, засварлахад бэлэн хэрэглүүрт шууд хадгалдаг гэдгээрээ онцлог юм.
