1986 онд үзэгчдийн хүртээл болж байсан “Top Gun” киноны үргэлжлэл болох “Top Gun: Maverick” өнгөрсөн баасан гарагт кино театруудад гарч эхэлснээс хойш дэлхий даяар 248 сая ам.долларын ашиг олоод байна. Ингэснээр жүжигчин Том Крузын 40 жилийн карьер дахь хамгийн өндөр орлоготой нээлт хийсэн уран бүтээл нь энэ кино болжээ.
“Paramount” болон “Skydance” компаниудын бүтээл, 170 сая ам.долларын зардлаар бүтсэн уг кино нь 2020 онд нээлтээ хийх хуваарьтай байсан ч цар тахлын улмаас хэд хэдэн удаа хойшлогдоод байв. “Top Gun: Maverick” амралтын өдрүүдэд Хойд Америкийн нийт 4732 кино театраас 134 сая ам.доллар олсон бол олон улсын бокс-оффист 124 сая ам.долларын ашиг олсон аж. Кино үзвэрийн томоохон зах зээлүүд болох Хятад, Оросын театруудад гараагүй гэхэд энэ нь маш өндөр үзүүлэлт юм.
Мөн өөр нэгэн сонирхолтой үзүүлэлт байгаа нь “Top Gun: Maverick”-ийн тасалбарыг худалдан авсан хүмүүсийн 55 хувийг 40-өөс дээш насныхан бүрдүүлсэн нь судалгаанаас харагджээ. Цар тахлаас хойш шинэ киноны нээлтийг хамгийн бага үзсэн насны бүлгийнхэн кино театрт эргэн ирж байгааг энэ нь батлан харууллаа хэмээн сэтгүүлчид онцолж байна.
Дэлгэцийн бүтээлүүдэд үнэлгээ өгдөг “Rotten Tomatoes” сайт дээр “Top Gun: Maverick” кино шүүмжлэгчдээс 97 хувийн оноо авсан бол үзэгчдийн зүгээс 99 хувийн оноо аваад байна.
