Тахлын үед эрчимжсэн цахим шилжилтэд хамгийн түрүүнд үр дүнтэй дасан зохицож буй салбаруудын нэг нь боловсролын салбар. Цахим сургалтын талаарх эргэлзээ буурч, дэлхийн боловсролын системийн үндсэн чиг хандлага боловсролын технологи руу шилжиж байна.
2025 он гэхэд боловсролын технологийн зах зээлийн үнэлгээ одоогийнхоос хоёр дахин өсөж 325 тэрбум ам.долларт хүрэх урьдчилсан тооцоолол байна. Цар тахал дэгдсэн сүүлийн 12 сарын хугацаанд онлайн боловсролын систем нь хэрэглэгчдийн өсөлт, хөрөнгө оруулалтаараа тэргүүлээд зогсохгүй твиттерийн чиг хандлага, Google хайлтаар ч тэргүүлсээр байна. Google Trends компанийн мэдээлснээр 2020 оны 4-12 сарын хооронд зөвхөн Энэтхэгийн интернэтэд ‘edtech’ хайлт 60 хувиар өсчээ. Мөн хэрэглэгчдийн боловсролын аппликейшнд зарцуулах дундаж хугацаа 30 хувиар нэмэгдсэн байна.
1. Duolingo
Байгуулагдсан он: 2011
Байршил: Питтсбург, АНУ
Гүйцэтгэх захирал: Луис Фон Ан
Зах зээлийн үнэлгээ: 3.30 тэрбум ам.доллар
Duolingo нь гар утасны үнэгүй аппликэйшнээр дамжуулан хэрэглэгчдэд чөлөөт цагаараа 30 гаруй хэлийг зугаатай аргаар сурах боломж олгодог. Хэрэглэгчид үг цээжлэн оноо цуглуулж, цагтай уралдан тоглоом тоглох зэргээр түвшингээ ахиулж болно.
2. Chegg
Байгуулагдсан он: 2005
Байршил: Санта Клара, АНУ
Гүйцэтгэх захирал: Дэн Розенсвейг
Зах зээлийн үнэлгээ: 2.35 тэрбум ам.доллар
Оюутнуудад учирдаг санхүүгийн дарамтыг бууруулах, ялангуяа сурах бичиг худалдан авахад тулгардаг асуудлыг бууруулах нь Chegg-ийн зорилго юм. Тус компанийн цахим худалдааны платформ нь оюутнуудад хэрэглэсэн сурах бичгээ худалдах, түрээслэх боломжийг олгохын сацуу үнэгүй цахим сургалтыг санал болгодог.
3. Coursera
Байгуулагдсан он: 2012
Байршил: Маунтен Вью, АНУ
Гүйцэтгэх захирал: Жефф Мажионкалда
Зах зээлийн үнэлгээ: 2.37 тэрбум ам.доллар
“Coursera” нь Стэнфорд, Дюк зэрэг дэлхийн топ 150 их сургуулийн хичээлийн хөтөлбөрийг нээлттэй форматаар хэрэглэгчдэд хүргэдэг. 20 сая гаруй оюутан тус платформыг ашиглан видео лекцүүдэд хамрагдаж, автомат үнэлгээтэй гэрийн даалгавар авч, бусадтайгаа мэтгэлцээн өрнүүлж байна.
4. Kahoot!
Байгуулагдсан он: 2013
Байршил: Осло, Норвеги
Гүйцэтгэх захирал: Айлерт Гиртсен Ханоа
Зах зээлийн үнэлгээ: 1.2 тэрбум ам.доллар
Хяналтын ажил, гэрийн даалгаврыг “kahoot” хэмээх зугаатай асуулт хариултын тэмцээн болгосноороо тус платформ хэрэглэгчдийг татжээ. Сурагчид нэгдсэн дэлгэц дээрх асуултуудад хариулах бөгөөд хамгийн түрүүнд зөв хариулсан нь оноо авах зарчмаар хоорондоо өрсөлдөнө.
5. Udemy
Байгуулагдсан он: 2010
Байршил: Сан-Франциско, АНУ
Гүйцэтгэх захирал: Грег Кокари
Зах зээлийн үнэлгээ: 2.16 тэрбум ам.доллар
Udemy нь академик мэргэжилтнүүд, оюутнуудад зориулсан цахим хичээлийн асар том сан юм. 2022 оны тавдугаар сарын байдлаар уг платформд 52 сая хүн 75 хэл дээрх 196 мянган хичээлээс судалж, 68 мянган багш хичээл зааж байна.
