“Airbnb” компанийн хамтран үүсгэн байгуулагч, тэрбумтан Жо Геббиа өнгөрөгч лхагва гарагт Жоржиа мужийн Брүүквуд ахлах сургуулийн төгсөлтийн ёслолыг нээж үг хэлэхдээ төгсөгчдөд гэнэтийн бэлэг барьжээ. “Forbes”-ийн тооцоолсноор нийт 7.8 тэрбум ам.долларын хөрөнгөтэй тэрбээр сургуулиа төгсөж буй 890 сурагч тус бүрд “Airbnb”-ийн 22 ширхэг хувьцааг бэлэглэсэн байна.
“Мөрөөдөл биелдэг гэдгийг харуулж, түүний төлөө тэмцэх урам зориг өгөх үүднээс та бүхэнд өөрийн мөрөөдлийнхөө нэгэн хэсгийг бэлэглэж байна” хэмээн Жо Геббиа өгүүлжээ. Түүнчлэн 22 ширхэг хувьцаа нь 2022 оны төгсөлтийг бэлгэдэж буйн зэрэгцээ энэ нь сурагчдыг зорилгодоо хүрэхэд туслах “бяцхан хөрөнгө оруулалт” болохыг онцолжээ.
Лхагва гарагт арилжаа хаагдахад “Airbnb”-ийн нэгж хувьцааны үнэ 110.40 ам.доллар байсан тул Брүүквуд сургуулийн төгсөгч тус бүр 2400 гаруй ам.доллартай тэнцэх хувьцаатай болсон аж. Нийтдээ уг бэлгийн үнэ цэн 2.2 сая ам.доллар хүрсэн байна.
Жо Геббиа нь тус сургуулийг 2000 онд төгссөн бөгөөд үүнээс найман жилийн дараа “Airbnb”-ийг байгуулахад хэрэг болсон ур чадварыг өгсөн тул сургуульдаа талархаж явдгаа тэрбээр илэрхийлж байв. Мөн өнгөрсөн жил Геббиа сургуулийнхаа урлагийн тэнхим болон кросс гүйлтийн клубийн үйл ажиллагааг хөгжүүлэхэд зориулж 700 мянган ам.доллар хандивлаж байв.
Өдгөө Жо Геббиа “Airbnb” компанийн бүтээгдэхүүн хариуцсан захирлын албан тушаалыг хашихаас гадна компанийнхаа ашгийн бус салбар болох Airbnb.org-ийг удирдаж байна.
