Пүрэв гарагт АНУ-ын Холбооны агаарын тээврийн удирдлагаас “Joby Aviation” стартап компанид арилжааны зорилгоор нисдэг таксины үйлчилгээг үзүүлэх зөвшөөрлийг олгожээ.
Ингэснээр тус компани удаан хугацаанд ажилласан чухал нэгэн зорилгодоо хүрсэн ч таван хүний суудалтай, бүрэн цахилгаан хөдөлгүүртэй онгоцоороо зорчигчдыг тээвэрлэж эхлэхийн тулд даган биелүүлэх ёстой нэмэлт хуулийн зохицуулалтууд үлдсэн хэвээр аж.
2024 онд нисдэг таксины үйлчилгээг АНУ-ын хотуудад нэвтрүүлнэ хэмээн зорилт тавиад буй “Joby” компанийн нэгж хувьцааны ханш дээрх мэдээ гарсны дараа 8 хувийн өсөлт үзүүлжээ. Энэ оны нэгдүгээр улиралд нислэг үйлдэх зөвшөөрөл авах ажил болон үйлдвэрлэлийн эхэн үеийн үйл ажиллагаатай холбоотой зардлаас шалтгаалан тус компани 62.3 сая ам.долларын алдагдал хүлээгээд байв.
“Joby”-ийн таксины үйлчилгээндээ ашиглахаар бүтээсэн онгоц нь лити ион зай хураагуур бүхий цахилгаан хөдөлгүүртэй, зургаан сэнстэй ч дуу чимээ маш бага, цагт 240- 320 километрийн хурдтай нисдэг, босоо тэнхлэгт хөөрч буух боломжтой гэдгээрээ давуу талтай.
2020 оны нэгдүгээр сард “Toyota” компани “Joby Aviation”-д 400 сая орчим ам.долларын хөрөнгө оруулсны дараа “Tesla”-г анх санхүүжүүлж байсан Жефф Сколлын “Capricorn Investment Group”, Лаурен Пауэлл Жобс зэрэг хөрөнгө оруулагч нэгджээ. Одоогоор “Joby” нийт 745 сая ам.долларын санхүүжилт босгож, 3.44 тэрбум ам.долларын зах зээлийн үнэлгээнд хүрээд буй.
