Цар тахлын давлагаанд хамгийн түрүүнд цохиулж, хамгийн сүүлд хэвийн байдалдаа шилжиж буй гэхэд хилсдэхгүй Ази-Номхон далайн бүсийн хувьд өнгөрсөн жил эдийн засгийн тун хүнд шалгууртай тулгарлаа. Гэвч Азийн залуу энтрепренерүүдэд шинэ санаа туршиж, шинэ бизнес эхлүүлж, амжилтын буухиаг авч явахад энэ нь төдийлөн саад болсонгүй.
Энэ жилийн “30 хүртэлх 30” жагсаалтад 4000 гаруй оролцогч нэр дэвшсэнээс “Forbes”-ийн сэтгүүлчид, тивдээ тэргүүлэх венчур капиталистууд, бизнесийн манлайлагчдаас бүрдсэн шүүгчдийн багийн дүгнэлтээр 10 салбар тус бүр 30 залуу буюу нийт 300 шилдэг залуу тодорсон байна. Жагсаалтад нийт 22 улс, бүс нутгийн төлөөлөл орсноос Энэтхэгийн 61, Сингапурын 34, Японы 33, Австралийн 32, Индонезийн 30, Хятадын 28 залуу багтаж чаджээ.
Сонирхолтой тоо баримтуудаас дурдвал:
- Тэдний авсан хөрөнгө оруулалтын хэмжээ: 3.5 тэрбум ам.доллар
- Тэдний дундаж нас: 26.8
- Жагсаалтад багтсан тамирчдын тоо: 15
- Хамгийн залуу төлөөлөл: 14 настай
- Зүүн Өмнөд Азийн төлөөлөл: 90
Ингээд “Forbes: 30 under 30 Asia” жагсаалтад багтсан онцлох энтрепренерүүдийг танилцуулж байна.
1. Жон Ху Ён
Нас 27 · Жүжигчин
Салбар: Энтертаймент, Спорт
Улс: Өмнөд Солонгос
“Netflix”-ийн “Squid Game” цувралаар жүжигчний гараагаа эхэлсэн тэрбээр анхны дүрээрээ “Screen Actors Guild Awards” ёслолд шилдэг эмэгтэй жүжигчний шагналыг хүртжээ. Инстаграм дээр 24 сая дагагчтай Ху Ёны хувьд өнгөрсөн жил “Louis Vuitton” брэндийн албан ёсны элч болсон юм.
2. Рохан Наяк
Нас 29 · “Pocket FM” хамтран үүсгэн байгуулагч
Салбар: Хэвлэл мэдээлэл, маркетинг, зар сурталчилгаа
Улс: Энэтхэг
Өндөр чанартай аудио стриминг үйлчилгээ болох “Pocket FM” нь анх гарснаасаа хойш дөрөвхөн жилийн хугацаанд 15 сая идэвхтэй хэрэглэгчтэй болжээ.
3. Риса Фэн
Нас 27 · BUD, хамтран үүсгэн байгуулагч
Салбар: Хэрэглээний технологи
Улс: Хятад
2019 тэрбээр хэрэглэгчдэд нийгмийн сүлжээний шинэ өнгө төрхийг мэдрүүлэх зорилгоор BUD аппликэйшнийг танилцуулжээ. Уг үнэгүй апп-ын хэрэглэгчид аватар, өхөөрдөм зураг гэх мэт 3D контентыг бүтээж, хоорондоо солилцох боломжтой бөгөөд одоогийн байдлаар “Google Play Store”-оос 12.5 сая удаа татагдаад байгаа аж.
4. Жеффери Лиу
Нас 27 · Xanfool, үүсгэн байгуулагч
Салбар: Санхүү, венчур капитал
Улс: Хонконг
Улс хоорондын гүйлгээний дэд бүтэцээр аж ахуйн нэгжүүдийг хангадаг “Xanfool”-ийг Лиу гурван жилийн өмнө байгуулжээ. Криптовалютын эрэлт нэмэгдэж эхэлснээс хойш түүний компанийн үнэлгээ хоёр дахин нэмэгдэж, 8 тэрбум ам.долларт хүрээд байна.
5. Саманта Лоркинг-Таннер, Эванжелин Титилас
Нас 29 · With Jéan, хамтран үүсгэн байгуулагч
Салбар: Урлаг, загвар, хоол хүнс
Улс: Австрали
Сайн найзуудын 2017 онд хамтран байгуулсан “With Jéan” нь тогтвортой хөгжлийг эрхэмлэсэн, голчлон Z үеийнхнийг чиглэсэн эмэгтэйчүүдийн хувцасны брэнд юм. Зөвхөн цахим дэлгүүрээр зарагддаг, байгальд шингэдэг материалаар хийсэн сав баглаа боодолтой гэдгээрээ тэдний бүтээгдэхүүн онцлог.
6. Дебеасинта Будиман, Гаррет Коэсванди
Нас 28,25 · Aplikasi Super, хамтран үүсгэн байгуулагч
Салбар: Жижиглэн худалдаа
Улс: Индонез
Будиман, Коэсванди нар дөрвөн жилийн өмнө байгуулсан худалдааны фирмийнхээ бүтээгдэхүүн хөгжүүлэлт, логистикийг тус тус хариуцдаг. “Aplikasi Super” нь эдийн засаг багатай жижиг хотууд, хөдөө орон нутагт өргөн хэрэглээний барааг хямд үнээр хүргэхийг зорьдог байна.
7. Кевин Жан
Нас 28,25 · “Inteluck”, үүсгэн байгуулагч
Салбар: Аж үйлдвэрлэл, эрчим хүч
Улс: Филиппин
Түүний найман жилийн өмнө байгуулсан логистикийн стартап “Inteluck” нь өдгөө Зүүн Өмнөд Азид үйл ажиллагаагаа хурдацтай тэлж байна. Анх логистикийн компаниудад хүргэлтийн тээврийн хэрэгслийнхээ байршлыг хянах шийдлийг гаргаж өгсөн бол өнөөдөр үйлчлүүлэгчид хүссэн үедээ “Inteluck”-ийн дижитал платформоор дамжуулан гуравдагч талын ачааны машиныг дуудах боломжтой болжээ.
8. Косүкэ Митараи
Нас 27 · “Qunasys”, хамтран үүсгэн байгуулагч
Салбар: Үйлдвэрлэлийн технологи
Улс: Япон
Квантын тооцооллын програм хангамж үйлдвэрлэгч “Qunasys”-ийг инженер мэргэжилтэй Митараи дөрвөн жилийн өмнө байгуулжээ. “Fujitsu” зэрэг томчуудаас хөрөнгө оруулалт авсан түүний компани өдгөө 12.4 сая ам.долларын санхүүжилт босгоод байна.
Жагсаалтын бүтнээр нь ЭНД дарж үзнэ үү.
