Босоо фермийн аж ахуйн “Farm66” компанийн үүсгэн байгуулагч, гүйцэтгэх захирал Гордон Тамын хувьд ирээдүйд хүн төрөлхтөн хотын барилгууд дунд, элсэн цөлд, тэр ч байтугай сансрын уудамд хөдөө аж ахуй эрхлэх боломжтойг харуулахыг зорьж байна.
Өнгөрөгч хоёрдугаар сард эх газрын Хятадад covid19-ийн эсрэг хатуу хөл хорио тогтоосон нь Азийн санхүүгийн төв, 7.4 сая хүн амтай Хонконгийг шинэ бүтээгдэхүүний хомсдолд оруулж, ялангуяа жимс, хүнсний ногооны лангуунуудыг хоосорчээ.
Хүн амын нягтаршил асар өндөр, хөдөө аж ахуйн талбай үлдээгүй шахам тус арлын хүнсний ханган нийлүүлэлт бараг бүхэлдээ гадаад орнуудаас хамааралтай байдаг. Тэр дундаа хүнсний ногоо тэргүүтэй шинэ бүтээгдэхүүний 90 гаруй хувь нь Хятадаас орж ирдэг ажээ.
Тэгвэл Гордон Там IoT мэдрэгч, LED гэрлүүд, робот зэрэг орчин үеийн технологийг ашигладаг босоо фермийн компаниараа дамжуулан Хонконгийн хүнсний бүтээгдэхүүний багагүй хувийг дотоодоос хангаж, цаашлаад бусад хотуудад ноу-хаугаа нэвтрүүлэхээр ажиллаж байна. “Хот дотор хүнсний ногоо ургуулж болдгоороо босоо фермийн технологи давуу талтай. Үүний ачаар хүнсний бүтээгдэхүүнийхээ ердөө 1.5 хувийг дотоодоосоо хангаж буй Хонконгчууд цаашид зөвхөн импортонд найдах хэрэггүй болно” хэмээн тэрбээр өгүүлжээ.
Там өдгөө компанийн үйл ажиллагаа хариуцсан захирлаар ажиллаж буй Билли Лэмийн хамт 2013 онд “Farm66” компаниа байгуулснаар босоо фермийн технологийг Хонконгод анхлан нэвтрүүлэгч болжээ. “Манай компани эрчим хүчний хэмнэлттэй LED гэрэл болон долгионы технологийг фермийн аж ахуйд анх удаа ашигласан. Гэрлийн спектрийн өнгө болгон ногооны ургалтанд өөр өөр нөлөө үзүүлдгийг олж мэдсэн нь бидний гол ололт юм.” Жишээлбэл улаан өнгийн LED гэрэл нь ургамлын ишийг уртасгадаг бол хөх өнгийн гэрэл нь навчны хэмжээг томруулдаг аж.
Түүнчлэн “Farm66” нь 2000 гаруй м.кв талбайтай битүү фермийнхээ чанарын хяналт, менежментийн ажлыг цахим сүлжээнд холбогдсон IoT мэдрэгчүүд болон роботуудын тусламжтай хийдэг байна. “Өнөө цагт эцэг эхийнхээ уламжлалт фермийн аж ахуйг хүүхдүүд нь өвлөж авахыг хүсэхгүй байна. Биеийн хүч шаардсан, ачаалалтай, уйтгартай ажил гэж боддог болохоор тэр. Харин технологийн ачаар энэ ажлын талбарыг хөгжүүлснээр шинэ үеийн фермер залуус гарч ирнэ.” хэмээн Гордон Там өгүүлж байна
Тус компанийн технологийн ашиглалт, ялангуяа гэрлийн эрчим хүч, усны урсгал, агааржуулалтын тал дээрх дата аналитик нь Хонконгийн тэрбумтан Тан Иугийн “ParticleX” венчур капитал фирмийн анхаарлыг татаж, хөрөнгө оруулалт авч чаджээ. Үүнээс гадна “Alibaba Entrepreneurs Fund”, Хонконгийн засгийн газрын дэмжлэгтэй “Cyberport”, Сингапурын тэрбумтан Роберт Нг-ийн үл хөдлөх хөрөнгө хөгжүүлэгч “Sino Group” зэрэг компаниуд хөрөнгө оруулагчдынх нь тоонд багтаж байна. Үл хөдлөх хөрөнгийн томчуудтай хамтран ажилласнаар бизнесийн болон орон сууцны зориулалттай барилгуудын дээвэрт нар, салхины эрчим хүчээр ажиллах хөрсгүй фермүүд байгуулахаар төлөвлөжээ.
Өнөөгийн байдлаар “Farm66” нийт 4 сая ам.долларын санхүүжилт аваад байгаа юм.
