Европын Холбоо 2027 он гэхэд Оросын шатах ашигт малтмалаас хамааралгүй болох, түүнчлэн ногоон эрчим хүчний шилжилтийг эрчимжүүлэх ажлынхаа хүрээнд цаашид гишүүн орнууд дахь шинэ барилга бүрд заавал нарны хавтан суурилуулах тухай хуулийн төслийг танилцуулсан байна.
Европын Комиссын “REPowerEU” төлөвлөгөөний нэг хэсэг болсон энэ санаачилгын дагуу иргэд, хуулийн этгээдүүд олон нийтийн, бизнесийн болон орон сууцны зориулалттай барилга барихдаа заавал нарны зай хураагуур суурилуулах хууль ёсны үүрэг хүлээх аж.
Өнгөрөгч лхагва гарагт танилцуулсан “REPowerEU” төлөвлөгөө нь эрчим хүч хэмнэх, эрчим хүчний хангамжийг төрөлжүүлэх, сэргээгдэх эрчим хүчийг эрчимтэй нэвтрүүлэх гэсэн гурван үндсэн тулгуур зорилтоос бүрджээ. Харин дээрх хуулийн төсөл нь сэргээгдэх эрчим хүчний зорилтод хамаарах бөгөөд Европын Комисс 2030 он гэхэд Европын Холбооны нийт хэрэгцээний 40 хувийг сэргээгдэх эрчим хүчээр хангах төлөвлөгөөндөө өөрчлөлт оруулж, 45 хувь болгон нэмэгдүүлээд байгаа аж.
