Мягмар гарагт Испанийн парламентад эмэгтэйчүүдийн нөхөн үржихүйн эрүүл мэндийн тухай хуулийн төслийг танилцуулжээ. Тус хуулийн гол заалтуудад өсвөр насны хүүхэд үр хөндөх ажилбар хийлгэхэд заавал эцэг эхийн зөвшөөрөл шаарддаг нөхцөлийг хүчингүй болгох, түүнчлэн сарын тэмдгийн зовуурьтай байгаа ажилчдад цалинтай чөлөө олгох зэрэг багтжээ.
Тэгш байдлын сайд, зүүний үзэлтэн Ирене Монтерогийн санаачилсан энэ хууль хэрэв батлагдвал Испани улс ажил эрхлэгчдэд сарын тэмдгийн чөлөө авах эрхийг олгосон Европын анхны орон болох юм. Түүний санал болгосноор дээрх нөхцөлийн дагуу эмэгтэйчүүдэд гурван өдрийн цалинтай чөлөө олгоход гарах зардлыг ажил олгогчид бус төрийн нийгмийн халамжийн систем хариуцах аж.
Үүнээс гадна сургууль, хорих газар зэрэг нийтийн байгууламж дотор ариун цэврийн хэрэглэл үнэгүй түгээх цэг байрлуулах, жирэмслэлтээс хамгаалах зарим төрлийн хэрэгслийг үнэгүй болгох гэх мэт заалтууд тус хуулийн төсөлд багтжээ.
Түүнчлэн Испанийн одоогийн хууль тогтоомжийн дагуу үр хөндүүлэх хүсэлт гаргасан эмэгтэйчүүдэд заавал гурван өдрийн “бодох хугацаа” өгдөг байсныг цуцалж, мөн 16-17 насны охидод үр хөндөлт хийхэд эцэг эхийн зөвшөөрөл шаарддаггүй болгох заалт орсон байна.
