“Airbnb” компанийн хамтран үүсгэн байгуулагч, гүйцэтгэх захирал, тэрбумтан Брайан Чески өөрийн карьер дахь хамгийн том сайн үйлсийн хандивыг оюутны тэтгэлэгт хөтөлбөрт зориулахаар болжээ. Тодруулбал АНУ-ын ерөнхийлөгч асан Барак Обама, түүний гэргий Мишель Обама нарын үүсгэн байгуулсан боловсрол, аялал жуулчлалын хосолмол хөтөлбөрийг дэмжих санд тэрбээр 100 сая ам.доллар хандивлах аж.
Уг санхүүжилтийг төрийн албанд ажиллахаар суралцаж буй их сургуулийн оюутнуудын тэтгэлэгт голчлон зарцуулахыг “Obama Foundation” даваа гарагт хийсэн мэдэгдэлдээ дурджээ. “Voyager Scholarship” нэртэй тус хөтөлбөр нь оюутнуудын сургалтын төлбөрийн зээлийг хөнгөлөхийн зэрэгцээ гадаад дотоодоор аялж туршлагаа тэлэх, ментортой болох боломжийг бүрдүүлж өгөхийг онцолжээ.
Хоёр жилийн хугацаатай энэхүү тэтгэлэгт тэнцсэн оюутнууд 25 мянган ам.доллар хүртэлх санхүүгийн дэмжлэг авахын зэрэгцээ зуны улиралд суралцангаа ажиллахаар явахдаа “Airbnb”-ийн сууцанд үнэгүй байрлах 10 мянган ам.долларын нэмэлт санхүүжилт авах аж. Ингээд зогсохгүй оюутнуудад сургуулиа төгссөний дараах арваад жилийн хугацаанд хүссэн газартаа аялахад нь “Airbnb”-ийн хөнгөлөлт болгож жил бүр 2000 ам.доллар олгох юм байна.
“Forbes”-ийн тооцоолсноор нийт хөрөнгийн хэмжээ нь 9 тэрбум ам.доллараар хэмжигдэж буй Брайан Чески “Voyager Scholarship” хөтөлбөр хэрэгжих таван жилийн хугацаанд ийнхүү дэмжлэг үзүүлэхээр болжээ. Ташрамд дурдахад, хөтөлбөрийн эхний үе шатанд 100 оюутныг хамруулан тэтгэлэг олгох аж.
