Өнгөрөгч долоо хоногт “Tesla” компани хянах дэлгэцийн ажиллагааны доголдлын улмаас АНУ-ын зах зээлээс 130 мянга гаруй машиныг эргүүлэн татах болсноо зарласан. Тодруулбал 2021 болон 2022 онд үйлдвэрлэгдсэн Model S, Model X, Model 3, Model Y загварын зарим машинуудын голын мэдрэгчтэй дэлгэц хэт халсан үедээ гацаж, эсвэл ажиллагаагүй болж байгаа тухай хэрэглэгчид гомдол мэдүүлсэн байна.
Тус дэлгэц ажиллахгүй болсноор араа, ухрах камер, гэрэл зэрэг жолоочийн хянах ёстой гол мэдээллүүдийг харах боломжгүй болох юм. Машины батарейг цэнэглэх явцад төв компьютерын ачаалал нэмэгдэж, хөргөлт хангалтгүй болсноор дэлгэцийн асуудал үүсэж байгааг АНУ-ын замын хөдөлгөөний аюулгүй байдлын албанаас мэдээлсэн байна.
Тэгвэл өнөөдөр БНХАУ-ын зах зээлийн зохицуулах агентлагаас дээрхтэй яг ижил шалтгаанаар Хятадад үйлдвэрлэгдсэн Model 3, Model Y загварын 107,293 машиныг эргүүлэн татах болсныг мэдэгджээ.
“Tesla” компани одоогоор энэ доголдолтой холбоотой осол, гэмтэл бүртгэгдээгүйг мэдэгдсэн бөгөөд тавдугаар сарын 3-наас эхлэн үүнийг засахын тулд машины компьютерын температур хуваарилалтыг сайжруулах программ хангамжийн шинэчлэл хийж байгаа аж.
