Афганистан улс 2022 оны санхүүгийн жилд 44 тэрбум афгани буюу 501 сая ам.долларын төсвийн алдагдал хүлээх болохыг Талибаны эрх баригчид бямба гарагт урьдчилан таамаглажээ.
Дайны хөлд нэрвэгдсэн тус улсын төрийн эрхийг аваад удаагүй Талибаны засгийн газар анх удаа жилийн төсвөө зарлахдаа хүлээгдэж буй орлого болон төлөвлөсөн зардлын зөрүүг хэрхэн нөхөх талаар тодорхой мэдээлэл өгөөгүй байна. Тус улсын төлөвлөсөн зарлагын хэмжээ энэ жил 231.4 тэрбум афгани, орлогын хэмжээ 186.7 тэрбум афгани байхыг шадар сайд Абдул Салам Ханафи мэдэгдэлдээ дурджээ.
Түүнчлэн төсвийн орлогыг гааль, яамдын харьяа газрууд болон уул уурхайгаас голчлон бүрдүүлэх болохыг Афганистаны сангийн яамны хэвлэлийн төлөөлөгч Ахмад Вали Хакмал өгүүлжээ.
2001 онд АНУ тэргүүтэй орнууд Афганистан руу цэргээ оруулснаас хойш барууны дэмжлэгтэй засгийн газрууд ээлжлэн солигдох явцдаа ихэвчлэн гаднын тусламжид найдсаар ирсэн юм. Харин 2021 оны наймдугаар сард гадаадын цэргүүд Афганистанаас гарч, засгийн газар огцорсноор Талибан бүлэглэл засгийн эрхийг авсан юм.
Гэхдээ дэлхий нийт Талибаны засгийн газрыг албан ёсоор хүлээн зөвшөөрөөгүй байгаа. Тус улсад аюулгүй байдлын асуудал нэмэгдэж, эдийн засгийн хямрал нүүрлэсэн хэвээр байгаа тул гаднын тусламжийн агентлагууд талибуудад шууд санхүүжилт олголгүйгээр 50 сая афганчуудад хэрхэн туслалцаа үзүүлэх боломжийг судалж байгаа юм.
