Гуравдугаар сарын 11-нээс хойш хамгийн түгээмэл криптовалютын токенуудын нийлүүлсэн үнэлгээ 26 гаруй хувиар, “Bitcoin”-ийн ханш 25 хувиар унаад байна. Тухайн үед “Forbes” сэтгүүлийн жагсаалтад 19 крипто тэрбумтан багтаж байсан бол өдгөө энэ тоо 16 болж буурсан аж.
Ялангуяа нээлттэй арилжаа хийдэг крипто фирмүүдийн хувьцаа, токений ханшинд бүх хөрөнгөө даатгасан магнатуудын хувьд сүүлийн хэдэн долоо хоног тун барцадтай болж өнгөрлөө. Тус салбарын хамгийн чинээлэг 11 эрхмийн алдсан хөрөнгийн хэмжээ 60 тэрбумыг давж, зах зээлийн үнэлгээнээс нь 400 гаруй тэрбум ам.доллар арчигдсаныг “Forbes” тооцоолсон байна.
Жишээлбэл “Binance”-ийн гүйцэтгэх захирал Жао Чанпений нийт хөрөнгийн хэмжээ нь гуравдугаар сард 65 тэрбум ам.доллараар тоологдож байсан бол өнөөдөр 17.4 тэрбум ам.доллар хүрч буурчээ. “Бид энэ зах зээлийн хүндэтгэхийн зэрэгцээ болгоомжтой хандах хэрэгтэй. Дээшилж, доошлох нь цаг хугацааны асуудал. Хамгийн гол нь тэр бүхэн заавал учир шалтгаантай байх албагүй” хэмээн тэрбээр лхагва гарагт жиргэсэн байна.
Түүнчлэн “Coinbase” хөрөнгийн биржийн үүсгэн байгуулагчид болох Брайан Армстронг, Фред Эрсам нар сүүлийн өдрүүдэд хоёул нийт хөрөнгийнхөө тэн хагасыг алджээ. Тус компанийн гүйцэтгэх захирал Армстронгийн хөрөнгийн хэмжээ 6.6 тэрбумаас 2.8 тэрбум ам.доллар болсон бол Эрсамын хөрөнгө 986 сая ам.долларт хүрч, тэрбумтнуудын эгнээнээс хасагджээ.
Харин венчур дэмжлэг бүхий компанид орлогынхоо тодорхой хэсгийг хуваарилсан крипто магнатуудын хувьд уналтын шуургыг одоогийн байдлаар харьцангуй хохирол багатай даван туулж байна. Жишээлбэл крипто арилжааны “FTX” платформын үүсгэн байгуулагч Сэм Бэнкман-Фрид гуравдугаар сараас хойш 3 тэрбум ам.доллар алдаж, хөрөнгийн хэмжээ нь өдгөө 21 тэрбумаар хэмжигдэж байна. Мөн Марк Закербергийн хуучин хамтрагчид болох Кэмерон Уинклвосс, Тайлер Уинклвосс нарын биткойн хөрөнгө эрс багассан ч тэдний байгуулсан “Gemini” крипто биржийн зах зээлийн үнэлгээ 7.1 тэрбум ам.доллар дээр тогтвортой хэвээр байгаа юм.
