Испанийн нэрт артист Сальвадор Далигийн бүтээл, 40 гаруй жилийн турш алга болсонд тооцогдож байсан онцгой лааны тосон баримлыг түүний 118 насны төрсөн өдрийг тохиолдуулан Хавайн “Harte International Galleries”-аас анх удаа олны хүртээл болгожээ. Уг бүтээл нь хаалттай зах зээлд 20 сая хүртэлх ам.доллараар үнэлэгдэх боломжтой гэсэн тооцоо гарсан байна.
“Алдагдсан лааны тосон баримал” хэмээн нэрлэгдсэн энэхүү бүтээл нь Есүсийн цовдлолтыг дүрсэлсэн “Christ of St. John of the Cross” нэртэй Далигийн цуврал хөөмөл урлалын загвар болгон ашиглагдаж байжээ.
Нэрээ нууцлахыг хүссэн хувийн урлагийн бүтээл цуглуулагч өмнөх эзэн нь 1978 онд Парист болсон сюрреалист зураачдын уулзалтын үеэр тус бүтээлийг Далигаас худалдаж авсныхаа дараа 40 гаруй жил хадгалсан гэж “Harte International Galleries”-ийн хамтран эзэмшигч Гленн Харте “Forbes” сэтгүүлд ярьжээ. Уг цуглуулагчаас өөр нэгэн бүтээл худалдаж авахаар судалж байхдаа Далигийн лааны тосон баримал одоог хүртэл байдаг гэдгийг олж мэдсэнээр тус галлерей бүтээлийг даруй тодорхойгүй үнээр худалдан авч, Хавайн Мауи дахь галерейдаа дэлгэн тавьжээ.
“Christ of St. John of the Cross”-ийн хувилбарууд нь ихэвчлэн 15,000-20,000 ам.долларын үнэд хүрдэг ч энэ нь “Harte International Galleries” тус лааны тосон баримлын хэвд өгсөн 10-20 сая ам.долларын үнэлгээтэй харьцуулбал харьцангуй бага тоо юм. Түүний бүтээсэн хөөмөл урлалын хувилбар ойролцоогоор 900 гаруй ширхэг байдаг ч энэхүү лааны тосон хэв нь Далигийн өөрийн гараар бүтээсэн анхны бүтээл бөгөөд “Энэ зүйлийн аль нэг хэсэгт Далигийн сахлын үс наалдсан байж магадгүй л байх” гэж Харте хошигнон өгүүлэв.
Галлерейн зүгээс хэвийг худалдах төлөвлөгөөгүй байгаа ч Харте Санкт-Петербург, Флорида дахь Сальвадор Далигийн музей болон Абу Даби, Луврын музей тэргүүтэй бүтээлийг зохих ёсоор нь үнэлж чадах газруудын цуглуулгад оруулахад татгалзах зүйлгүй гэдгээ илэрхийлсэн хэдий ч тэрбээр тус байгууллагуудтай албан ёсоор харилцаа тогтоогоогүй болохоо нэмж дурдав.
