Европын Холбооны Улсуудын Нисэхийн Аюулгүй Байдлын Агентлаг (EASA) болон Европын Өвчнөөс Урьдчилан Сэргийлэх, Хянах Төв (ECDC) тавдугаар сарын 16-ний өдрөөс эхлэн Европын нисэх онгоцны буудал болон нислэгийн үеэр зорчигчид амны хаалт зүүх шаардлагагүй болж буйг мэдэгдэв.
“EASA” тус мэдэгдэлдээ Европ даяар вакцинжуулалт болон сүргийн дархлааны түвшин өндөр байгааг харгалзан үзэж тус салбарыг олон улсын нийтийн тээврийн байгууллагуудын шаардлагад нийцүүлэн энэхүү шийдвэрийг гаргаснаа онцолсон.
“EASA”-гийн гүйцэтгэх захирал Патрик Ки энэхүү зохицуулалтыг “агаарын тээврийн салбарыг хэвийн байдалд оруулахад чухал алхам” болж буйг дурдаад зорчигчдыг “хариуцлагатай байж, бусдын сонголтыг хүндэтгэхийг” уриалсан бол “ECDC”-ийн захирал Андреа Аммон гараа угаах, хүн хоорондын зай барих, амны хаалт зүүх нь “халдварыг бууруулах хамгийн сайн аргуудын нэг” болохыг анхааруулав.
Шинэ зөвлөмжүүд хүчин төгөлдөр болсны дараа тус амны хаалттай холбоотой дүрэм журам тухайн агаарын тээврийн компаниас хамаарч өөрчлөгдөх магадлалтай бөгөөд амны хаалт зайлшгүй зүүх ёстой чиглэлүүд рүү нисэх болон буцах нислэгт зорчигчдыг холбогдох дүрэм журмыг зайлшгүй дагаж мөрдөх шаардлагатай болохыг эрх баригчид мэдэгдсэн. Харин эрсдэлтэй бүлгийн зорчигчдод “тус дүрмийг үл харгалзан” амны хаалтаа тогтмол зүүхийг анхааруулсан бөгөөд хамгийн тохиромжтой буюу FFP2 / N95 / KN95 гэсэн төрлөөс сонголт хийхийг зөвлөв.
Энэхүү алхам нь агаарын тээвэр, аялал жуулчлалын салбарыг Итали, Франц, Швед зэрэг цар тахлын хязгаарлалтыг бүхэлд нь эсвэл хэсэгчлэн цуцалсан ЕХ-ны орнуудтай уялдуулсан шийдвэр болж байна. Мөн АНУ-ын холбооны шүүгч Өвчний Хяналт, Урьдчилан Сэргийлэх Төв (CDC)-ийн бүрэн эрхийг хууль бус гэж үзсэнтэй холбоотой дөрөвдүгээр сарын дунд үеэс эхлэн тус улсын агаарын тээврийн компаниуд амны хаалт зүүх шаардлага тавихаа больсон бөгөөд ЕХ-ны зүгээс гаргасан тус шийдвэр нь АНУ-ын агаарын тээврийн салбартай уялдаж буй юм.
