Норвеги улс 2040 он гэхэд оффшор эрчим хүч буюу далайн салхины эрчим хүчийг голлох эх үүсвэр болгон өргөжүүлэх төлөвлөгөөгөө өнөөдөр ил болгожээ. Газрын тос, байгалийн хийн нөөцөөр өнөөгийн баялгаа бий болгосон тус улсын ирээдүйд сэргээгдэх эрчим хүчний экспортлогч болох ногоон хөгжлийн бодлогын нэг хэсэг нь энэ аж.
Төлөвлөгөөний дагуу 2040 он гэхэд оффшор цахилгаан станцуудын хүчин чадлыг 30 гигаватт болгон нэмэгдүүлэх зорилт тавьсан болохоо Норвегийн засгийн газраас мэдэгдсэн байна. Зүүн төвийн үзэл баримтлал бүхий тус засгийн газар амлалтаа зөрчиж, Норвегийн газрын тос, байгалийн хийн үйлдвэрлэлийг дэмжсэн хэвээр байна хэмээн байгаль орчин хамгаалагчдын зүгээс шүүмжлэлд өртөөд байв.
Норвеги улс өдгөө дотоодын хэрэгцээгээ хангах эрчим хүчний дутагдалтай байгаа ч шинэ төлөвлөгөө нь айл өрхүүд болон аж үйлдвэрийн эрэлтийн хүлээлтээс хол давж байгаа аж. “30 гигаватт нь манай одоогийн эрчим хүчний үйлдвэрлэлийг гарцыг хоёр дахин нэмэгдүүлэх юм. Мөн үйлдвэрлэсэн эрчим хүчнийхээ багагүй хэсгийг гадаад улсууд руу экспортлохоор төлөвлөсөн” хэмээн тус улсын Ерөнхий сайд Йонас Гар Стоере сэтгүүлчдэд мэдээлэл өгөхдөө өгүүлжээ.
Түүнчлэн дэлхий дахин цэвэр эрчим хүчний ирээдүй рүү шилжих явцдаа газрын тос болон байгалийн хийг ашиглах шаардлагатай хэвээр тул одоо байгаа эрчим хүчний салбарын ноу-хау дээр тулгуурлан оффшор эрчим хүчийг хөгжүүлэх болохоо мэдэгджээ.
