Тэрбумтан Илон Маск мягмар гарагт илтгэл тавихдаа “Twitter” компани Дональд Трампын хаягийг хаасан явдлыг “тэнэглэл” хэмээн тодорхойлж, тус компанийг 44 тэрбум ам.доллараар худалдаж авах наймаагаа дуусгавал өмнөх ерөнхийлөгчийн твиттерийн эрхийг буцааж сэргээх болохоо мэдэгджээ.
Тодруулбал “Twitter”-ийн дээрх алхам нь “ёс суртахууны хувьд буруу, хэмжээ хязгаараас хальсан мунхаг шийдвэр” байсныг тэрбээр “Financial Times” сониноос зохион байгуулсан “Future of the Car” арга хэмжээнд цахимаар оролцохдоо онцолсон байна.
Түүнчлэн “Twitter” дээр спам, ботуудыг эс тооцвол хэрэглэгчийн хаягийг бүр мөсөн хаах явдлыг хязгаарлах ч үүнийг хэрэглэгч өөрийн хүссэн болгоноо хэлж болно гэж ойлгож болохгүйг тэрбээр өгүүлжээ.
Сар орчмын өмнө “Twitter” компанийг худалдаж авах саналаа ТУЗ-ийн гишүүдээр нь зөвшөөрүүлсэн Илон Маск одоогоор санхүүжилтээ баталгаатай болгохоор ажиллаж байна.
Ерөнхийлөгч байх хугацаандаа “Twitter”-ийг идэвхтэй хэрэглэдэг байсан Дональд Трампын хувьд хэдий эрхийг нь буцааж сэргээсэн ч тус платформд дахин нэгдэхгүй болохоо саяхан илэрхийлсэн. 2021 оны нэгдүгээр сарын 6-нд түүний дэмжигчид Капитолын ордонд үймээн гаргасны дараа хүчирхийллийг дэмжсэн гэсэн үндэслэлээр “Twitter”-ээс түүний хаягийг хаасан билээ.
