“Pop art” урсгалын эцэг гэгддэг Энди Уорхолын зурсан Мэрилин Монрогийн хөрөг даваа гарагт дуудлага худалдаанд 195 сая ам.доллараар зарагдсанаар хамгийн өндөр үнэ хүрсэн Америк уран бүтээлчийн бүтээл болж түүхэнд бичигджээ.
Урлагийн бүтээл худалдаалагч Швейцар хос болох Томас Амманн, Дорис Амманн нарын хувийн цуглуулгад байсан “Shot Sage Blue Marilyn” нэртэй энэхүү хөргийг “Christie’s”-ийн дуудлага худалдаагаар нэрээ нууцалсан нэгэн эрхэм татвар, шимтгэлийг оролцуулаад дээрх үнээр худалдан авсан аж.
Мэрилин Монрог нас барснаас хоёр жилийн дараа буюу 1964 онд Энди Уорхол түүний хөргийг өнгө будгаар ялгарсан таван өөр хувилбараар зурсны нэг нь энэ зураг юм.
Сонирхуулахад, Леонардо да Винчигийн “Salvator Mundi” зураг 2017 онд 450 сая ам.долларын үнэ хүрснээр түүхэнд дуудлага худалдаагаар хамгийн өндөр үнээр зарагдсан уран бүтээл болж байжээ.
