Аз болж МакКензи Безос ямбатай эмэгтэй байсангүй. Учир нь 1996 онд “Amazon”-ийн төв байранд ямбалан суух цаг, зав байсангүй.
Тэрбээр тал хэсгийг нь гал тогооны өрөө болгон тохижуулсан оффист залуу ажилчдын хамт ажилладаг байв. Түүнийг өдөрт 12 цагийн турш санхүүгийн тооцоо гаргаж байх зуур ойр хавиар нь ажилтнууд чихцэлдэж орж, богино долгионы зуух ашигладаг байжээ. Харин шөнө болоход тэрбээр агуулахын байранд очиж, захиалсан бараануудыг хайрцагладаг байв.
“Amazon”-ийн долоо дахь ажилтан Майк Хэнлон түүнийг “агуу хувь нэмэр оруулсан хүн” хэмээн тодотгож “Тэрбумтны эхнэр болоход авьяас чадвар бүдгэрдэг бол Маккензигийн авьяас гялалзсаар байсан” гэсэн юм.
Өдгөө 52 настай МакКензигийн нууцлаг байдлыг анхнаасаа сайтар боловсруулсан төлөвлөгөө гэлтэй. “Amazon”-ийн эхэн үеэс л нэрээ нууцалсан тэрбээр 2019 оны нэгдүгээр сард Жефф Безосоос гэрлэлтээ цуцлуулах болсон тухай мэдээлэл тархсанаас хойш ч ярилцлага өгсөнгүй. Гэр бүл цуцлах ажиллагаа тухайн оны долдугаар сард эцэслэхэд МакКензи “Amazon” компанийн дөрвөн хувийг эзэмшиж үлдсэн юм. Ийнхүү эзэмшдэг хувьцааных нь үнэлгээ цар тахлын үед огцом өсөж, өдгөө нийт хөрөнгө нь 37.2 тэрбум ам.доллараар хэмжигдэж буй тул МакКензи энэ жилийн “Forbes”-ийн тэрбумтнуудын эрэмбэд 30 дугаар байрт шууд бичигдэж байна. “Amazon”- ийн анхны хөрөнгө оруулагчдын нэг Ник Ханауэр “МакКензи компанийнхаа 50 хувийг авах ёстой байсан юм. Түүнийг Жеффтэй эн тэнцүү зүтгэсэн гэж хэлж болно” гэв.
RELATED STORIES
Сан-Францискод өссөн, айлын дунд хүүхэд Маккензи дөнгөж зургаан настайдаа “The Book Worm” хэмээх 142 хуудастай ном бичиж байжээ. Аав нь санхүүгийн мэргэжилтэн, ээж нь гэрийн эзэгтэй байсан бөгөөд Маккензи Коннектикут муж дахь дотуур байртай Хочкис сургуулийг нэг жилээр урьдчилж төгсжээ. Улмаар Кембриж, Принстоны их сургуульд англи хэл шинжлэлээр суралцаж, Нобелийн шагналт зохиолч Тони Моррисоноор судалгааны ажлаа удирдуулж байв. Түүнд англи хэл зааж байсан профессоруудын нэг Жефф Нунокава “Тэр ерөнхийдөө даруу, төлөв зантай, дуугай, авьяаслаг оюутан байсан” гэсэн юм.
Тэрбээр сургуулиа амжилттай төгссөн “D.E. Shaw” хеж санд ажиллаж байхдаа Жеффтэй болзож эхэлсэн бөгөөд 1994 онд “Amazon”-ийг үүсгэн байгуулахын тулд ажлаасаа гарчээ. Түүний оролцоо анхнаасаа маш өндөр байв. “Хэнд ч, ямар ч албан тушаал байгаагүй… Тиймээс Маккензи бараг бүгдийг хийдэг байсан” хэмээн анхдагч ажилчдын нэг Тод Нельсон дурссан юм. Маккензи зөгнөлт зохиол бичих ажилдаа шамдан орох үүднээс “Amazon”-ийг олон нийтэд нээлттэй болсон 1997 онд компанийн ажлаас хөндийрчээ.
2005 онд хэвлэлийн компани “HarperCollins” анхны ном “The Testing of Luther Albright”-ийг нь хэвлэх хүртэл Маккензи олны анхааралд өртөлгүй явж чадсан юм. Тони Моррисон түүний зохиолыг “ховор бүтээл” хэмээн дүгнэдэг. МакКензигийн дараачийн бүтээл бол 2013 онд хэвлэгдсэн “Traps” юм.
Тэрбээр 2019 онд өөрийн бүх хөрөнгөө бүгдийг нь хандивын үйл ажиллагаанд зориулах болохоо амлаж байсан билээ. Ийнхүү тэрбээр сүүлийн есөн сарын хугацаанд 465 байгууллагад нийт 3.8 тэрбум ам.долларын хөрөнгө хандивласан болохоо мэдэгджээ. Түүний хандив өгсөн байгууллагын жагсаалтад бүхий л төрлийн үйл ажиллагаа явуулдаг ашгийн бус байгууллагууд багтсан бөгөөд ялангуяа “үзэл бодол, дуу хоолой нь нийтэд хангалттай хүрдэггүй” бүлгүүдийг дэмжихэд гол анхаарлаа хандуулсан болохоо өөрийн “Medium” хуудсандаа бичжээ.
2020 оноос хойш Маккензи Скоттын ашгийн бус байгууллагуудын өгсөн нийт хандивын хэмжээ 12 тэрбум ам.долларт хүрээд байна.
