Технологийн “Nvidia Corporation” фирм өөрийн видео тоглоомын бизнес дэх криптовалют олборлолтын нөлөөллийн тухай зохих ёсоор мэдүүлээгүй гэсэн үндэслэлээр 5.5 сая ам.долларын торгууль төлөхөөр болсныг АНУ-ын Үнэт цаас, биржийн хороо мэдэгджээ.
2018 оны санхүүгийн улиралд тус компани видео тоглоомын зориулалт бүхий чип үйлдвэрлэлээс олсон ашиг нь нэмэгдэхэд крипто олборлолт “чухал элемент” байсныг тодорхой мэдүүлээгүй аж. Тус хорооны энэхүү дүгнэлтийг “Nvidia” компанийн зүгээс үгүйсгээгүй бөгөөд иргэний хэргийн нэхэмжлэлийн төлбөр болох 5.5 сая ам.долларыг төлж барагдуулахыг зөвшөөрсөн аж.
2018 оноос эхлэн криптовалют олборлолтод “Nvidia”-ийн үйлдвэрлэсэн график карт хамгийн түгээмэл ашиглагдаж байсан ч тус компани энэ мэдээллийг орхигдуулсан нь хөрөнгө оруулагчид, шинжээчдийг төөрөгдүүлсэн явдал болсныг Үнэт цаас, биржийн хороо мөн онцолсон байна.
