БНХАУ, ОХУ-ын төв банкнууд өөрсдийн үндэсний төлбөр тооцооны системийн хэрэглээг хоёр улсад харилцан нэмэгдүүлж, түгээн дэлгэрүүлэх тухай хэлэлцээр хийхээр товлосныг Москва дахь Бээжингийн төлөөлөгч ТАСС агентлагт ярилцлага өгөхдөө дурджээ.
“Оросын Мир болон Хятадын UnionPay төлбөрийн системийг хэрэглээг хоёр улсад дэлгэрүүлэх асуудлыг талуудын төв банкны төлөөлөл зөвшилцлийн үндсэн дээр шийдвэрлэх болно” хэмээн ОХУ-д суугаа БНХАУ-ын Онц бөгөөд бүрэн эрхт элчин сайд Жан Ханьхуй өгүүлжээ.
Украин дахь эзлэн түрэмгийллийн хариуд Оросын банкнууд дэлхийн санхүүгийн системээс бүрэн тусгаарлагдсан билээ. Харин Оросын иргэдийн хувьд гадаад төлбөр тооцоо хийх цөөхөн сонголтууд үлдсэний дунд “Мир” болон “Unionpay” байгаа юм.
Мөн “Visa Inc”, “MasterCard Inc” тэргүүтэй барууны санхүүгийн үйлчилгээний томоохон компаниудын олонх нь хойд хөршид үйл ажиллагаагаа зогсоогоод байна.
Хятад улс Оросын Украин дахь ажиллагааг буруутгаагүйн зэрэгцээ Москвагийн эсрэг барууны хатуу хориг арга хэмжээг шүүмжилсэн юм. Хоёр улс сүүлийн жилүүдэд харилцаагаа улам бэхжүүлж, ялангуяа өнгөрөгч хоёрдугаар сард стратегийн хүрээн дэх “хязгааргүй” түншлэлээ тунхагласан билээ.
