Хуурайшилт, ган гачиг, түүнээс улбаалсан хүнсний хомсдолтой тэмцэхэд хүн хүч нэмэгдүүлэх үүднээс БНАСАУ-ын эрх баригчид оффисын ажилтнууд болон үйлдвэрийн ажилчдыг газар тариалангийн гол бүс нутгууд руу илгээх шийдвэр гаргасныг тус улсын төрийн хэвлэл лхагва гарагт мэдээлжээ.
Улирлын шинжтэй үер болон ган гачиг нь усалгааны систем, дэд бүтэц тааруу Хойд Солонгост багагүй аюул учруулдаг бөгөөд хэрэв ноцтой байгалийн гамшиг тохиолдлоо гэхэд олон улсын хоригоос болж тусгаарлагдсан эдийн засгийг нь сүйрүүлж, худалдааг зогсонги байдалд хүргэх эрсдэлтэй юм.
Цар тахал, тайфун салхинаас шалтгаалсан хүнсний нөөцийн эмзэг байдлыг арилгах арга хэмжээнд иргэн бүр хамтран зүтгэхийг Хойд Солонгосын удирдагч Ким Жон Ун өмнө нь уриалсан аж.
Харин энэ удаа төрийн албан хаагчид, байгууллагын ажилтнууд, үйлдвэрийн ажилчид ган гачигтай бүс нутгуудад ус шахах төхөөрөмж зөөж суурилуулах, усны эх үүсвэр шинээр гаргах, сайжруулах зэрэг ажилд газар тариалан эрхлэгчидтэй хамтран зүтгэж буйг “Родун Синмун” сонин мэдээлжээ.
Хойд Солонгост дөрөвдүгээр сарын дундаж цаг агаар өмнөх жилүүдээс цельсийн 2.3 хэмээр дулаан байсан бөгөөд гандуу хуурай нөхцөл бүх нутгуудаар ирэх долоо хоног хүртэл үргэлжлэхийг тус улсын цаг уурын хүрээлэнгээс анхааруулжээ.
