Д.Мөнхбаяр карьераа эхлүүлэхдээ онлайн худалдааны стартап “Shoppy.mn”-ий ес дэх ажилтан болж бизнес хөгжүүлэлтийг нь хариуцах болсноор өнөөдөр тус платформыг онлайн худалдааны зах зээл дэх гол тоглогч болоход хөтөлсөн юм. “Shoppy”-ийн бий болгосон ноу-хау, технологийн ололтыг өнөөдөр Монголын худалдаа эрхлэгч аж ахуйн нэгжүүдийн дийлэнх нь ашиглаж байна.
Өдгөө тэрбээр цахим худалдааны “Shoppy”, бизнес платформ “Cody”, аялал, амралтын “JoinMe”, “Mezorn”, “CoinHub” зэрэг 10 орчим технологийн компанийг эгнээндээ нэгтгэсэн “Intelmind” группийн Хөрөнгө оруулалт хариуцсан захирлын албыг хашихын зэрэгцээ худалдааны салбарт эргэлт авчрах дараагийн төсөл “Zary” компанийн Гүйцэтгэх захирлаар ажиллаж байна. Zary.mn онлайн худалдааны платформыг тэд Монголын худалдааны салбарыг нийтэд нь цахимжуулах хүртээмжтэй төсөл хэмээн харж буй бөгөөд энэ онд 10 мянгаас дээш дэлгүүрийг нэгтгэхээр зорьж байна.
