Кэмбрижийн их сургууль болон Лондонгийн Эзэн хааны коллежийн эрдэмтдийн хэвлүүлсэн шинэ судалгаанд дурдсанаар covid19-ийн маш хүнд халдвараар өвчлөөд эдгэрсэн хүмүүсийн сэтгэн бодох чадвар 20 насаар хөгширсөнтэй тэнцэхүйц хэмжээнд доройтож, IQ-ийн түвшин нь 10 хүртэл оноогоор буурдаг байж магадгүй аж. Энэ нь тус вирусийн халдвар хүний танихуйн болон сэтгэцийн эрүүл мэндэд удаан хугацааны сөрөг нөлөө үлдээдэг гэсэн таамгийг бататгах өөр нэгэн баримт болжээ.
“eClinicalMedicine” сэтгүүлд нийтлэгдсэн тус судалгаанд Covid19-ийн хүндрэлээс амьд үлдсэн хүмүүсийн сэтгэн бодох чадвар нь 50-аас 70 насны хооронд тохиолддог танихуйн доройтолтой ойролцоо түвшинд хүрч муудсан байсныг тэмдэглэжээ. Ялангуяа хүндрэлийн үедээ амьсгалын аппарат зүүж байсан хүмүүсийн сэтгэн бодох чадвар түүнээс ч илүү хэмжээнд муудсан байжээ. Энэхүү доройтол нь заримдаа зургаан сарын хугацаанд үргэлжилсэн бол зарим өвчтөнд цаашид хэвийн болох эсэх нь тодорхойгүй байдалтай үлдсэн аж.
Дээрх судалгаанд 2021 оны гуравдугаар сараас долоодугаар сарын хооронд эмнэлэгт хэвтэн эмчлүүлсэн 28-83 насны 46 өвчтөнийг хамруулсны зэрэгцээ covid19-ийн халдвар авсан 66 мянган иргэнд ажиглалт хийсэн байна.
