Дэлхийн хамгийн чинээлэг эрхмүүдийн жагсаалтад тавдугаарт бичигдэж буй тэрбумтан Уоррен Баффетийн эзэмшдэг хөрөнгө оруулалтын “Berkshire Hathaway Inc” компани энэ оны эхний улиралд үнэт цаасны зах зээлд 51 тэрбум гаруй ам.долларыг хувьцаа худалдан авахад зарцуулсан болохыг “Ройтерс” мэдээлжээ.
Небраска мужийн Омаха хотод төвтэй, 1965 оноос хойш Баффеттийн удирдлага дор үйл ажиллагаа явуулж буй тус компани өнгөрөгч бямба гарагт мэдэгдэл хийхдээ энэ улиралд олсон татварын өмнөх ашиг нь өмнөх жилийнхээс төдийлөн өөрчлөгдөөгүй байгаа нь зарим бизнесүүд нийлүүлэлтийн гинжин хэлхээний тасалдлыг даван туулж чадсантай холбоотой болохыг онцолжээ.
Түүнчлэн тус компани энэ улиралд өөрийн хувьцаанаасаа 3.2 тэрбум ам.долларын үнэ хүрэх хувьцааг буцаан худалдаж авсан аж. Тайлангаас үзвэл Уоррен Баффет “Berkshire Hathaway” дахь их хэмжээний мөнгөн хөрөнгийг танах (106 тэрбумаас 40 тэрбум доллар хүртэл) шинэ арга олсон бололтой гэж шинжээчид дүгнэж байна.
Хамгийн сүүлд “Berkshire Hathaway” видео тоглоом хөгжүүлэлтийн “Activision Blizzard Inc” компанийн 9.5 хувийг буюу 5.6 тэрбум ам.доллартай тэнцэх хэмжээний хувьцааг худалдаж аваад байгаа. Үүнээс гадна өнгөрсөн улиралд эрчим хүчний “Occidental Petroleum Corp”-ийн 6 тэрбум ам.доллартай тэнцэх хувьцааг, технологийн “HP Inc”-ийн 4.2 тэрбум ам.доллартай тэнцэх хувьцааг, мөн даатгалын “Alleghany Corp”-ийг бүтнээр нь 11.6 тэрбум ам.доллараар Уоррен Баффеттийн компани худалдаж авсан билээ.
