БНХАУ-ын дарга Ши Жиньпин эдийн засаг дахь монополын эсрэг хүчин чармайлтаа улам бэхжүүлж, хөрөнгийн эмх замбараагүй өсөлтийг таслан зогсоохын төлөө улс үндэстнээрээ нэгдэхэд уриалсныг “Синьхуа” агентлаг мэдээлжээ.
Тэрбээр өнгөрсөн баасан гарагт Хятадын коммунист намын улс төрийн товчооны хурлыг даргалахдаа санхүүгийн эрсдэлээс урьдчилсан сэргийлэх, чанаргүй хөрөнгө, хөөсрөлт үүсгэхгүй байхад анхаарах зэргээр тус улсын хөрөнгийн зах зээлийг “эрүүлээр” хөгжүүлэх ёстойг тэмдэглэсэн байна.
“Капитал бол нийгмийн бүтээлч хүчийг дэмжих чухал зэвсэг юм. Гэвч өдгөө энэ нь зөвхөн ашиг хонжоо хайсан шинж чанартай болсон байна. Иймд үүнийг зохицуулж, боловсронгуй болгохгүй бол эдийн засаг, нийгмийн хөгжилд хэмжээлшгүй их хор уршиг авчирна” хэмээн өгүүлжээ.
Түүнчлэн хөрөнгийн тэлэлт, платформ дахь монополтой холбоотой авлигын хэргийн хяналт шалгалтаа чангатгаж, таслан зогсоохоо амласан байна.
