“Bored Ape” NFT цувралыг гаргадаг “Yuga Labs” стартап компани өөрсдийн бүтээж буй видео тоглоомын виртуал ертөнц дэх газрыг илэрхийлэх токенууд борлуулж, 285 сая ам.доллартай тэнцэх хэмжээний криптовалют олсон байна.
Өнгөрсөн жил АНУ-д төвтэй тус компани бичийг дүрсэлсэн 10 мянга гаруй дижитал бүтээлээс бүрдсэн “Bored Ape Yacht Club” хэмээх блокчэйн суурьтай токенийг арилжаанд оруулан үйл ажиллагаагаа эхлүүлж байв.
Зураг, бичлэг, цахим тоглоомын цуглуулга гэх мэт дижитал өгөгдлүүдээр илэрхийлэгддэг биет бус токен буюу NFT дэлхий дахинд алдаршиж эхэлснээс хойш “Bored Ape”-ийн үнэ огцом өсөж, тус бүр нь олон мянган ам.долларт хүрч, зарим нь дуудлага худалдаагаар зарагдаж, Пэрис Хилтон, Мадонна зэрэг алдартнууд ч эзэмших болсон билээ.
Өнгөрөгч гуравдугаар сард “Andreessen Horowitz” фирмийн тэргүүлэн явуулсан санхүүжилтийн үе шатнаас 450 сая ам.долларын хөрөнгө оруулалт авсан “Yuga Labs” өдгөө “мета-ертөнц” хэмээх ойлголт руу анхаарлаа хандуулж байгаа аж.
Тус компани “Bored Ape” брэндээсээ сэдэвлэн “Otherside” нэртэй виртуал орчин бүтээх бөгөөд дөрөвдүгээр сарын 30-нд тэрхүү орчин дахь газрыг орлох “Otherdeeds” токенуудыг арилжиж эхэлсэн байна. “Otherdeeds”-ийг зөвхөн дээрх төслийн хүрээнд өнгөрөгч гуравдугаар сард гаргасан “ApeCoin” криптовалютаар худалдаж авах боломжтой байсан аж.
Ийнхүү тус бүр нь 305 “ApeCoin”-оор үнэлэгдэх 55 мянган “Otherdeeds”-ийг худалдаанд гаргаж, тухайн өдөртөө бүгд зарагдаж дууссан байна. Энэхүү арилжаанаас тус компани 16,775,000 “ApeCoin” буюу 285 сая гаруй ам.доллар ашиг олсныг тооцоолжээ.
