2019 онд “Amazon” компани ногоон хөгжлийн бодлогынхоо хүрээнд цахилгаан хөдөлгүүрт автомашин үйлдвэрлэлийн “Rivian” компанитай стратегийн түншлэл байгуулж, 1.3 тэрбум ам.долларын хөрөнгө оруулж байв. Гэвч энэ оны нэгдүгээр улиралд “Rivian” маш хангалтгүй өсөлт үзүүлж, үнэлгээнийхээ тэн хагасыг алдсан нь томоохон хувьцаа эзэмшигчдэд нь хүнд цохилт болсон байна.
Пүрэв гарагт гаргасан “Amazon”-ийн орлогын тайлангаас үзвэл тус компани “Rivian” дахь хувьцаанаасаа нийт 7.6 тэрбум ам.долларын алдагдал хүлээжээ. Инженер Роберт Скэринжийн үүсгэн байгуулсан “Rivian”-ийн нэгж хувьцааны ханш 2022 оны эхний гурван сард 50 хувиар унасан үзүүлэлттэй байна. Хэдийгээр тус компани өнгөрсөн оны дөрөвдүгээр улиралд анх IPO хийх үедээ үнэлгээгээ огцом өсгөж, 86 тэрбум ам.долларт хүргэж байсан ч түүнээс хойш тогтмол бууралттай байсаар өнөөг хүрсэн нь энэ юм.
“Amazon” компанийн хувьд “Rivian”-ийн ирээдүйд ихээхэн итгэл хүлээлгэж, 2030 он гэхэд 100 мянган хүргэлтийн машин үйлдвэрлүүлэх гэрээ байгуулаад байгаа. Харин өмнөх сард “Rivian” компаниас мэдэгдэл хийхдээ нийлүүлэлтийн гинжин хэлхээ болон дотоод үйлдвэрлэлийн саатлаас болж энэ жилийн турш ердөө 25000 цахилгаан пик-ап болон SUV үйлдвэрлэснээ зарласан юм.
Үүнээс гадна тус компанийн 12 хувийг эзэмшдэг “Ford” компани мөн адил томоохон алдагдал хүлээж, 5.4 тэрбум ам.долларыг алдсан болохоо лхагва гарагт мэдэгджээ. Харин “Amazon” компани “Rivian”-ийн 18 хувийг эзэмшдэг аж.
