Esports буюу цахим спортын “Team Liquid” байгууллага удаан хугацааны ивээн тэтгэгч болох “Alienware” компанитай хамтран тамирчдын ур чадварыг нэмэгдүүлэх зорилготой судалгааны лабораторийг Лос-Анжелес хотноо нээжээ.
Калифорнийн Санта-Моникад байрладаг тус байгууллагын төв оффисын өргөтгөл болон нээгдсэн “The Pro Lab” нь хамгийн сайн хүчин чадалтай “Alienware” компьютерүүд, сервер, дэлгэцээр тоноглогджээ. Лабораторид ашиглагдах гол програм хангамж нь анх хөлбөмбөгийг тамирчдад зориулан бүтээгдсэн “BrainsFirst” тестийн програм аж. Үүний тусламжтай тамирчны хариу үйлдлийн болон контролын хурд, төвлөрөх чадвар, түргэн хугацааны ой санамжийн үзүүлэлт зэргийг хэмжих юм байна.
“Team Liquid” шинэ лабораторидоо багийн бүрэлдэхүүн дэх 120 мэргэжлийн тамирчин, мөн багийн академид суралцдаг залуу тамирчдыг тестэнд хамруулах аж. Түүнчлэн тамирчдын нойрны хэмнэлийг зохицуулах мэргэжилтэн, тэдний авч буй шим тэжээлийг хянах хоол зүйч тус лаборатори дээр ажиллахаар болжээ.
