Оросын эзлэн түрэмгийллийн уршгаар энэ жил найман сая гаруй Украины иргэн эх орноо орхин дүрвэх болохыг НҮБ-ын дүрвэгсдийн асуудал эрхэлсэн Дээд комиссарын газраас (UNHCR) мягмар гарагт гаргасан мэдэгдэлдээ урьдчилан таамаглажээ.
Европ тивд дэлхийн хоёрдугаар дайнаас хойш тохиолдоогүй хамгийн том дүрвэгсдийн хямрал нүүрлэж буй энэ цаг үед Украины нийт 5 сая иргэн хил даван дүрвэсэн бол 7.7 сая иргэн улс дотроо шилжин суурьшаад байгааг тус агентлагийн хэвлэлийн төлөөлөгч Шабиа Манту өгүүлсэн байна. Өөрөөр хэлбэл дайн эхэлснээс хойш хоёр сарын хугацаанд Украины 44 сая хүн амын аравны нэг нь эх орноо орхижээ.
Түүнчлэн нийт дүрвэгсдийн дийлэнх нь буюу 10 дүрвэгч тутмын 9 нь эмэгтэйчүүд, хүүхдүүд байгааг тэрбээр онцолсон байна. Тэдний 2.9 сая нь Польш руу, 780 мянга нь Румын руу, 500 мянга нь Унгар руу, 440 мянга нь Молдав руу, 360 мянга нь Словак руу дүрвэсэн болох нь НҮБ-ын тоо баримтаас харагджээ.
Үүнээс гадна дайны хөлд нэрвэгдсэн бүс нутгуудад 13 сая гаруй хүн аюулгүй газар руу нүүж чадалгүй гацсан байгааг Шабиа Манту мөн өгүүлжээ.
