Санхүүгийн үйлчилгээний “Robinhood” компанийн гүйцэтгэх захирал Влад Тенев мягмар гарагт хийсэн мэдэгдэлдээ компанийнхаа бүтэн цагийн ажилтнуудын 9 хувийг цомхотголд оруулах болсноо мэдэгджээ. Цар тахлын эхэн үед тэдний үйлчилгээг идэвхтэй хэрэглэгчдийн тоо эрс нэмэгдсэн ч түүнээс хойш тогтмол буурч, улмаар сүүлийн зургаан сарын турш “Robinhood” компанийн хувьцааны ханш 72 хувиар унасан аж.
2019-2021 оны хооронд бага хүүний түвшин, засгийн газрын санхүүгийн дэмжлэг, цар тахлын хорио хязгаарлалт зэрэг хүчин зүйлээс шалтгаалж “Robinhood” аппликэйшний хэрэглэгчдийн тоо огцом өссөн тул тус компани ажилтнуудынхаа тоог 700-аас 3800 болгон нэмсэн байна.
Харамсалтай нь ажилтнууд их байх тусам шаардлагагүй олон орон тоо үүсч, зохион байгуулалт төвөгтэй болсон тул цомхотгол хийхээс өөр аргагүй болсныг Влад Тенев өгүүлжээ.
Мягмар гарагт арилжаа хаагдах үед “Robinhood”-ын нэгж хувьцааны ханш 3.75 пунктээр унаж, үнэ нь 10 ам.долларт хүрсэн бол цомхотголын тухай мэдээ гарсны дараа нэмэлт арилжаагаар 4.8 пунктээр унаж, 9.52 ам.доллар болжээ.
